Shillong, K’lyngkot 19 : Watla ka Bharatiya Janata Party (BJP) kan pynieng haduh 60 ngut ki kyrtong ha ka elekshon MLA-2023 hynrei kala khmih lynti pat ban ioh jingjop tang hapdeng 10-15 ngut.
Ia kane la pynpaw da u President ka BJP-Meghalaya Bah Ernest Mawrie haba iakren bad ki nongthoh khubor bad pyntip ba kane ka jingkhein ka la mih na ka jingle survey jong ka party.
“Kine ki 10 haduh 15 tylli ki constituency ki dei kiba ngi la buh ban jop…bad ka lad ban ioh jingjop ka long kaba jur” ong u Bah Ernest.
Kat kum ka jingong jong u, ka Party ka khmih lynti ban jop bun tylli ki constituency hynrei ka hap pat ban iaid kat kum ka jingkhein ba ioh n aka survey bala pynlong da ka party, ha kaba ka jingjop kam noh satia sha ka party lait na ki 10-15 constituency.
“Ngin ym iaid kat kum ki khubor ba mih na ki kot khubor lane ki kot lyngkdop, ngi la iaid sha ki shnong ki thaw bad ia ka kaiphod ngi la buh hakhmat ka jingialang jong ka Central Committee” ong u Bah Mawrie.
