Shillong, Lber 7: Ka iing dorbar hynne ka sngi Thohdieng kala sakhi ia ka jingiania kaba khluit hapdeng u Myntri Rangbah ka jylla Conrad K Sangma bad u Nongialam ka Liang Pyrshah Mukul Sangma ha ka kynta kylli jingkylli.
Ha ka por ba u Myntri Rangbah u dang jubab ia ka jingkylli ha kaba iadei bad ka jingthung ka sorkar jylla ia ki Consultants, u Nongialam ka Liang Pyrshah ula ieng ban pyrshah da kaba ong ba ka rukom ai jubab ka long kaba jrong palat bad ka dei tang ka buit ban pynduh lad ia ki dkhot ka Liang Pyrshah ban kylli shuh shuh ia ki jingkylli bynrap.
“U CM u lah dep jubab ba ym don ia ki (jingtip). Phi lah dep ban batai ia kiwei pat ki bynta kaba ailad ia ngi ban buh shuh shuh ia ki jingkylli. Kadei tang ka buit ban pynduh ia ngi ban ioh kylli jingkylli bynrap shuh shuh, ia kaba kam dei ha katei ka lynti. Kadei ka kynta kylli jingkylli, kala long pynban kumba shu iaid pynkyllain” la ujor u Mukul.
Haba pynshai halor katei ka jingkynnoh u Conrad ula ther ia ka Liang Pyrshah ba kam don ia ka jingkwah ban sngap ia ka jubab kaba pyni ba ki kwah ban pyni sha u paidbah ba kila kylli bun tylli ki jingkylli”.
“Ka paw kumba kim kwah, kumta ai ba kin iai kylli jingkylli” la ong u Myntri Rangbah bad ka bynrap, “Ka jingkylli kaba kylli ka donkam ban ai ia ka jingbatai. Ngam thait ban ai iaka jubab hynrei nga hap ban leh namar ba nga don ia ka jingkitkhlieh. Kumta lada nga jubab da kaba ong tang shi lain kan yn ym pyni ia ka dur baroh kawei. Kata kadei ka mat ka jong nga. Ngam pyrshang ban pynjlep iano iano ruh”.
Ha katei ka por, u Lamphang ka iingdorbar thawain u Thomas A Sangma ula tuklar bad ong ia u Myntri Rangbah ban pyndep ia ka jingai jubab ka jong u.
