Shillong, Rymphang 26: U MP ka Congress na Shillong Bah Vincent H Pala, la kynnoh ba u khlem pynlong ia ka jingialang jong ka DISHA ha East Khasi Hills bad Ri-Bhoi District ha kine ki shisnem bala leit noh.
Ia kane la pyntip da u Myntri ka Tnad Community & Rural Development Abu Taher Mondal ha ka jubab ia ka jingkylli hapoh ka Dorbar Mang tyngka hynne ka sngi Nyngkong.
Halor ka jingkyrpad jong u MLA ka VPP na Mawryngkneng bad MLA ka UDP na Nongpoh ban kyntu ia u MP ba un khot ia ka jingialang jong ka DISHA, u Mondal ula ong “Ngan sa pyntip ia u MP ba un khot ia ka jingialang jong ka DISHA”.
Kat kum ka jingong jong u, ka jingpynlong ia ka jingialang jong ka DISHA ka shong ha ka bor jong u MP bad ka dei ka jingialang ban shong bishar kam halor ka jingpyntreikam ia ki flagship programme bapher bapher ka Sorkar Pdeng bad ruh ban khmih ia ki jingeh ba mad da ki nongioh jingmyntoi.
Haba jubab bynrap, u Myntri Rangbah ka Jylla Conrad K Sangma ula ong ba ka DISHA kam dei satia ka prokram jong ka Sorkar Jylla.
“Kam dei ka kamram jong ka Sorkar Jylla ban pynlong ia ka jingialang. Ka Sorkar India ka peitngor(ia ki skhim ka Sorkar Pdeng) lyngba ki MP bad ki MP jong kato ka Constituency ki don ia ka bor ban khot ia ka jingialang namar ka dei ka kam ba long beit tang hapdeng ka Tnad bad u MP”ula ong.
