Shillong, Nailur 21 : Ka Resolution bala wanrah da u MLA ka Voice of the People Party (VPP) na Nongkrem Bah Ardent M Basaiawmoit, ba dawa ban sangeh noh ia ka jingpynkhein ia ki kyndon ka Meghalaya Transfer of Land Regulation Act, 1972, kala shah pynliem da ka voice vote hapoh ka Iingdorbar Thaw Ain, hynne ka sngi Palei.
“Ki Nos ki jop bad ka Resolution kala shah pynliem” pynbna u Lamphang ka Iingdorbar Thomas A Sangma.
Ia kane ka Resolution la wanrah sha ka jingiavote hadien ba u Bah Ardent ula pynbna ia ka rai ban nym weng satia ia ka Resolution da kaba pynpaw ba um pat hun satia ia ka jubab jong ka Sorkar Jylla.
U Bah Ardent ula ong ba ka don ka jingpynkhein ia ka Act hynrei ka Sorkar kam kwah ban pdiang ba ki briew ki bym pat shah kdup ha ka Land Transfer Act, kila iathied jaka pathar ha Ri-Bhoi District.
“Kumno ki lah ban thied jaka haba kim dei ki nongshongshnong ka Meghalaya?. Kaei kaba ka Sorkar kan leh pyrshah ia kine ki briew bad khang ia ki ban thied ia ki jaka ha Ri-Bhoi?” ula buh jingkylli.
Ula kyntu ruh ia ka Sorkar Jylla ba kan pynmih ia ka public notice halor ka jingbatai ba bniah ia ka jingmut ‘riewlum’ (Tribal).
Haba jubab bynrap, u Myntri Rangbah Conrad K Sangma ula ong ba kam shym la don satia ka jingpynkhein ia ka Land Transfer Act. “Baroh ki kam (ba iadei) ki bar jylla ki dei kiba la pynshong nongrim kat kum ki kyndon ka Act” ula ong.
U Conrad ula ong ba kino kino ki briew ki lah ban leit sha IIngkashari lada ki don ka jingsngewkhia ba ka don ka jingpyn khein ia ka Act.
“(Namar) ngim pat ju iohi ia kano kano ka case bala wanrah hakhmat bad ia kito ki case kiba la Iingkashari kala ai hukum, ka Sorkar kala dep pyntreikam ia ki hukum” ula bynrap.
U Myntri Rangbah ula kular ruh ba ka Sorkar kan sa shong bishar ia ki jingai jingmut bala ai da u Dkhot halor kumno ban nang pynkhlain ia ka Land Transfer Act.
Shuwa kane, haba wanrah ia ka Resolution, u bah Ardent u kwah ban tip ‘kiei ki sienjam bala shim pyrshah ia kito ki briew kiba la die iala ki jaka sha ki briew kibym shah kdup ha ka Land Transfer Act, khamtam u Syiem ka Raid Marwet uba la ju mlien ban leh ia kine ki kam beain. Nalor kane, kaei ka sienjam ban sa shim pyrshah ia u Deputy Commissioner uba kloi ban register ia kine ki jaka kiba long pyrshah ia ki kyndon jong ka Ain’.
Shuwa kane, u Myntri ka Tnad Revenue & Disaster Management Kyrmen Shylla ha ka jubab ula ong ba kala shai b aka Sorkar haba pyniaid ia ki kam ba iadei bad ka transfer, mutation, mortgate, will bad kiwei kiwei, ka ju iiad kat kum ki kyndon bala buh ha ka Meghalaya Transfer of Land Regulation Act, 1971 9Act 1 of 1972) bad ka Meghalaya Transfer of Land Regulation Rules, 1974.
“Haduh mynta, kam pat ju don ka jingpynkhein ia ka Ain kaba la wan sha ka jingtip jong ka Sorkar” ula ong.
