Shillong, Iaiong 09 : Ki Autonomous District Council (ADC) ki khlem lah ban aiti ia ki Utilization Certificate (UC) ba pyntreikam ia ki skhim bapher bapher ka Sorkar Pdeng, bala mang naduh u snem 2017 haduh u 2022.
Na ka song pisa bala ai T. 385.71 klur kum ka Central Grant jong u snem 2017-2022, ki ADC kila lah ban aiti ia ki UC tang T. 129.63 klur (34%) na ka song bala ai, ong ka State Finances Audit Report jong ka Comptroller & Auditor General of India jong u snem ba kut haduh ka 31 tarik Lber, 2022.
Ka jingbym aiti ia ki UC ka mut ba ki bor pyniaid kim shym la lah ban ai jingbatai ba kumno kila pynlut ia kane ka song pisa ha kine ki snem lane ki khlem pynlut satia, kala ong.
Ka CAG kala ai jingmut bala ai ban bthah ia ki ADC ba kin aiti noh ia ki UC ba pynsahteng.
Ha kajuh ka por, ka kaiphod kala ong ba ka annual account jong ki ADC ki don ha ka arrear baa r ne hynriew snem.
Ka Annual Account ba dang sah jong ka KHADC ka long naduh u 2020-21 haduh 2021-2022, JHADC ka long 2019-202 haduh 2021-2022 bad ka GHADC ka long 2016-17 haduh 2021-2022.
Kat kum ka Fund rules jong ka JHADC bad GHADC, ka annual account la dei ban aiti sha ka PAG ( Audit) hashuwa ka 30 tarik Jylliew manla u snem hynrei kam shym la don satia ka jingkdew ha ka fund rules jong ka KHADC.
