Tura, Lber 11 : Ki Pulit ka West Garo Hills kila kyntait ba ka jingsiat ki Pulit ka dei ka daw ka jingiap ki arngut ki briew ha ka jingkulmar kaba jia ha Chibinang myn ha ka sngi Nyngkong.
Kane ka jingpynshai kala mih hadien ka jingleh post mortem ia ki metiap ha Tura Civil Hospital.
Ka metiap ka pyni ba uwei na ki lanot ula iap hadien ka jingshah dung da ka tiar kaba nep katba uwei pat ula iap na ka jingmynsaw ba shah siat ha ka pistol shna hi.
U Superintendent of Police Abraham T Sangma ula iathuh ba ki Pulit kila lah phah ban tehlakam ia ka huri hura kila hap ban siat sha suin kum ka jingpyrshang ban pynsaphriang ia ki Kynhun kiba iakulmar para maki.
Hynrei, ka kaiphod post mortem ka pynthikna ba ka jingiap kam dei satia da ki tiar siat ki Pulit.
Ia kine ki metiap lah lap na ka jaka ba jia ka jingkulmar bad lah pynkit mar mar ban leh post mortem.
Ki bor sorkar kila pynjur bha ia ka jingpahara ha ka thain katba ka jingtohkit ka dang iaid shakhmat halor ka jingkulmar ba mih ha Chibinang.
