Shillong, Naiwieng 02: Ki bor jong ka mei mariang, ki la wan ban khanglad khang lynti bha ia ka Meghalaya, ha ki artylli ki lympung ialehkai katta ka Ranji Trophy bad kumjuh ha ka U-23 men’s Col CK Nayudu Trophy kiba dei ban long hangne ha nongbah Shillong bad Patna mynta ka sngi.
Kat kum ka prokram, mynta ka sngi, ka kyhun ialehkai ka Meghalaya ka la dei ba kan iakhun pyrshah ia ka Goa na ka bynta ka Col CK Nayudu Trophy Elite Group ha madan ialehkai jong ka MCA ha Polo, pynban u slap ba jur ba la wan ban ther hynnin ka janmiet ka la pynjhiej lut ia baroh kawei ka bynta jong ka madan, ha kaba lada u slap u dang wan ban bteng lehse ka lah ruh ba kan pynlong ia kane ka jingiakhun ba kan nym lah ba kan jam shakhmat.
Katba ha nongbah Patna, ka dei ka sngi kaba ar ia ka Meghalaya ba kan iakhun pyrshah ia ka Bihar ha ka Ranji Trophy, kaba hangne arsngi la shu kut noh khlem pat ioh ban sdang bad kaba la buh hapdeng ka jingartatien ba lehse yn lah ban ioh ia ka resol.
Katba kawei ka jingiakhun ba la mih madan da ki thei ialehkai ka jylla ka long ha ka Trophy, ha kaba ki thei ialehkai jong kaMizoram ki la jop da 6 wiket ha ka jingiakhun kaba la long ha Lucknow.
Ka Meghalaya kaba la wan ba kan tied nyngkong, ka la lah ba kan kamai 50 ron hadien ba la hap noh 9 wiket, katba ka Mizoram ka la kot ia kane ka thong ha ka 12.4 over hadien ba ka la hap noh 4 wiket.
Ha kaba kut, ka kynhun ki thei ialehkai ka Meghalaya ki la lah ban bat ia ka kyrdan kaba san kaba la wan hadien ba ki la khur tang kawei ka jingjop kaba long pyrshah ia ka Arunachal Pradesh, hadien ba kan shah rem lai sien.
