Shillong, Nailar 15 : Haba rakhe ia ka lyngkhuh 77 snem ka jingioh laitluid ka Ri India, u Myntri Rangbah ka Jylla Conrad K Sangma ha ka sngi Ba-ar ula khlei ia 10 tylli ki jingkular sha u paidbah ka Jylla bad pruid dak ia ki thong jong ka Sorkar ha kine ki san snem ban wan, ka ban aikam aijam ym tang ia 5 lak ngut hynrei ban pynurlong ruh iala ka jingphohsniew ban pynlong ia ka Meghalaya kaba biang nadong hadong.
Haba khein ia u snem 2023-2028 kum ka por ban wan ki jingkylla ha Meghalaya, u Conrad ula ong ba ka thong jong ka Sorkar ha ki kam pynroi ia ka longbriew manbriew bad ka imang sahlang ha kine ki san snem wan wan lah ban kyllum lang ha ki 10 tylli ki jingkular.
Kine ki 10 jingkular ki dei : KI surok bad lah pyniasoh kiba bha, ka jingpynpoi kor umbam umdih sha man ki iing, ka jingai bording ba khlem thut ha baroh kawei ka Jylla, ka jingpynioh kor internet ha baroh ki Shnong, ka jingai Iing sha baroh kiba dei hok ban ioh, ka jingpynbiang ia ki jingdonkam baroh na ka bynta ki Khunlung naduh ba ki dang don ha kpoh ka kmie, ban wanrah ia ka pule puthi kaba janai, ka koit ka khiah ia baroh, ki madan ialehkai ha baroh ki jingialehkai bad ki jingtei kiban donkam ban kyntiew ia ka riti ka dustur bad ki samla.
“Ngi la iatreikam mynta bad baroh ki kynhun bad ki paralok kynthup ka Sorkar India, ki Agency ba bei tyngka, ki Jaidbynriew jong ngi, ki Seng treimon sngewbha bad ki lad pathai khubor ban pynurlong ia kine ki jingkular” ula ong haba kren ha ka jingrakhe ka ia I-Day ha Madan Polo hadien ba pynher ia ka lama lai rong ka Ri.
Hynrei, ula kyntu ia ki Nongshongshnong ba kin long kiba la pynkhreh ia ki jingtynjuh jongka Pyrthei kum ka jingkylla ka mariang, ki jingpynthut jong ki kor technology bad kiwei kiwei. “Ngi dei ban pyrkhat bha bad leh eiei, hangne hala Jylla bad ha pyrthei baroh kawei. Ka Sorkar jong nga kan iai kut jingmut ban pynthikna ia ka bha ka miat ka lawei jong baroh ki nongshongshnong. Ngin iai pyrshang ban nang pynkhlain ia ka GDP ka Jylla bad ban aikam aijam ia 5 lak ngut ki nongshongshnong” ula ong.
U Conrad ula ong ba ka Sorkar kan pynkhlain bha ha ka jingpyntreikam iaki prokram ka Sorkar India bad kiwei kiwei ki project kiba bei pisa nabar ka Ri. “Ngin nang pyniar ia ka jingtreikam jong ki prokram ka Jylla kum ka FOCUS, PRIME, YESS Meghalaya, MOTHER, PROGRESS bad ka Home Stay Scheme. Ki Prokram ba thymmai kum ka CM-Elevate kan nang plie lad shuh shuh ia ki samla bad ki nongsengkam sengjam lajong” ula pyntip.
Ula kdew ba ha kine ki san snem ban wan, ka Sorkar MDA-II kan tei ia ka Meghalaya ha kaba “Ki Cooperatives jong ki Nongrep kin lah ban khaii iala ki marrep sha kylleng ki iew hapoh ka Ri bad shabar ri kumjuh, ka Meghalaya kaba shah niew kum ka jaka wan shangkai kaba biang duh hapoh ka Ri, ka Meghalaya kaba bun ki Shnong kila don ia ki skul, ki jaka sumar, ki surok, ka umbam umdih, ka bording, ka kot internet, ki iing ki sem, ki madan ialehkai, ka Meghalaya kaba baroh ki Khunlung khynnah ki ioh ia ka kabu ba biang tam ha ka jingim lyngba ki jingkyrshan naduh ba ki dang don ha kpoh haduh da kila khie samla, ka Meghalaya kaba dei ka Nongialam hapoh ka Ri ha ka jingialeh ban pyrrben ia ki khlaw ki btapda kaba jingai jingsiew ia ki kam ban pynneh bad iada ia ki khlaw, ka Meghalaya kaba ki kynthei ki ioh ia kajuh ka hok ban iashimbynta ha ka ioh ka kot, bad kiwei kiwei.
Pule ruh: Pynbna u Conrad ia ka CM-CONNECT, ban rah ia ka jingshakri ka Sorkar sha man ki thliew Iing
