Khlam Corona | Kynnoh ka KSU ba kem pang ki Rangbah naduh ba injek dawai Covid

Dawa jurip ia ka Tnad ka Koit ka Khiah ha Shnong Langdongdai

Nongstoin, Jymmang 13 : Ka Khasi Students Union (KSU)-Nongtrai Sepngi Unit, kala kynnoh ba bun ki tynmen ki kri jong ka thain Langdongdai, West Khasi Hills kila kem pang naduh ba ki ai injek dawai Covid-19 haduh mynta mynne bad kila hap ban sangeh ia ka jingleit lum leit wah ban trei ban ktah.

Ka KSU-Nongtrai Sepngi hapoh ka jingialam u President samla Kitbor Riangtem, kala pynmih ia kane ka jingkynnoh hadien ka jinghiar jurip ia kane ka shnong hynne ka sngi Nyngkong, kaba long ruh hadien ka jingkyrpad jong ki Nongshongshnong ban wan jngoh lem ia ka jingdon ki riew rangbah kiba la kem pang naduh ba injek dawai Covid.

Ha kane ka jingjurip, ka KSU kala iakynduh ia ki katto katne ki rangbah kiba kynthup ia u Bah Robin Sangriang ba 75 snem ka rta uba dei na Nongdubir, Bah Rosten Puwein ba 69 snem ka rta bad u Bah Tonel Rynniaw ba 63 snem ka rta kiba dei na Langdongdai.

Ka KSU ka kynnoh ba kine ki rangbah kila iohpang naduh ba ki ai injek dawai iada Covid bala tip kum ka Covid Shield bad mynta kila hap ban shu shong iing shong sem noh khlem da lah shuh ban leit trei leit ktah namar ka jingban ki jingpang bapher bapher.

Halor kane ka jingshem, ka KSU-Nongtrai Sepngi kala dawa ia ka Tnad ka Koit ka Khiah ba kan leit jurip ia ka shnong Langsongdai bad ki shnong ba marjan bad ban ai dawai ne sumar lem ia kine ki rangbah kumba ki shimkhia ha ka por ba ki wan ban ai injek covid.

Ka KSU ka pyntip ba u Bah Robin Sangriang ha ka por ba u dang shait dang khlain, ula trei kum u Myntri ba Rangbah jong ka Hima Nonglang Sirdarship bad u dei uba ju bat ruh kum u nongpyn thoh khyndew ka Hima nalor u dei uba trei kam lyngkha bad kiwei kiwei.

Ka ong ba une u rangbah ula kem napang kynsan kynsan naduh ka 27 tarik u Iaiong jong u snem 2021.