Shillong, Nailar 12 : U runar Bangladeshi ba ioh kem da ki paidbah ka shnong Kaitha Kona kaba don ha khappud ka South West Khasi Hills ha ka sngi Nyngkong, ula khlad noh na ka jingmynsaw hadien ka jingshah bom shnong ha u paidbhur.
Une u runar u kyrteng u Akram ba na Sherpur, Jenaghati, Bangladesh. Ia une u runar la pynbna iap hadien ba poi ha Khonjoy PHC hynnin hi ka janmiet.
Kat kum ka jingiathuh u Superintendent of Police ka SWKH, une u runar u dei napdeng ki 8-9 ngut ki runar Bangladesh kiba la kiengatiar bha, kiba wan ban pyntriem ha ka shnong Rongdangai, SWKH myn ha ka sngi Thohdieng bala lah.
Kine ki runar kila wan ban rahbor ia uwei u rangbah ba kyrteng u Balsrang Marak hynrei une u rangbah ula ioh phet. Ki Pulit ha ryngkat ki BSF kila ioh kem shuwa ia 4 ngut ki runar Bangladesh ha ka sngi Saitjain na Khonjoy bad ha ka sngi U Blei, kila ioh kem sa uwei na Gilagora.
Ia u Akram la kem da ki paidbhur ha ka sngi Nyngkong na Kaitha Kona bad la leit shimti da ki Pulit hapdeng ka jingmynsaw kaba jur.
Ki Pulit kila register case halor kane ka jingjia bad ka jingtohkit mynta kala iaid shakhmat. Ka jingtohkit ia ki 5 ngut kiwei pat ki runar Bangladesh ka dang iaid shakhmat.
