Shillong, Lber 23: Ha kawei ka jingjia hajan Kynroh Maram shwa ban poi ha Mawryngkneng, uwei u Rangbah briew bala 60 snem ka rta, ula khlad hashen na ka jingshah iuh ha kawei ka trok hadien ki jingjia aksiden ha ka miet sngi Saitjain.
U SP ka East Khasi Hills bah Vivek Syiem u la pyntip ba kawei ka trok kaba don ia u number ML10 D 0678 kaba la niah da u Benjamin Ryntathiang ka dang wan na Jaintia Hills sha Shillong.
Mar ia poi ha kawei ka jaka ba dheng kali, katei ka trok ka la iaid sha ka liang kabym dei bad ka la ia tynrah bad kawei ka kali kaba ym lah ban tip ka dei kaei, kaba la pynlong ia ka jingjulor kaba malu mala. Katei ka trok ka la phet bak na katei ka jaka hadien ba la jia katei ka jingjia.
Katei ka trok kaba don u number ML10 D 0678, ka la sahkut ha shiteng surok. U Deilangshirup Law uba la 60 snem ka rta uba shong ba sah ha Lower Mawprem, Shillong u la hiar na katei ka kali ban leit jurip ia ki jingjulor. Katba u dang peit ia ka bynta ba shapoh jong katei ka trok da kaba thiah ha madan, kawei pat ka trok kaba don ia u number BR05 D 1938 kaba niah da ka Jewanmi Talang na Musiaw, West Jaintia Hills ka la iuh na met jong u, bad u Bah Deilangshirup Law u la khlad noh na ka jingmynsaw ha katei ka jaka.
Ia ka met jong une u rangbah ba khlad noh la pynkit sha ka jaka sumar ha (CHC) na ka bynta ban leh ïa ki kyndon aiñ kiba donkam.
