Nongpoh, Nailur 05: Ka khubor na ki pulit ka Ri Bhoi District ka pyntip, ba u runar u ba la shah bom shah tied ha ki paidbhur ha ka miet 3 tarik u Nailur ha MIDC, Umiam, u la khlad noh hapoh Civil Hospital, Shillong namar ka jingjur palat ka jingmynsaw.
Lah ban kdew, u wei u briew ba la tip kyrteng kum u Bartan Marak (37) napoh Garogoan Udalgiri Assam, u la leit ban phrong tuh hapoh iingsah jong ka Kong Moureen Kharnaior hapoh MIDC, Umiam ban tuh.
Une u briew ula rah ia ka pistol Air Gun da kaba u la pyntieng ruh ban siat ia ki katto katne ngut ki briew.
Hynrei namar ka jinglap kloi ki paidbah, une u runar u la phet krad bad rynkoh ruh na kawei ka kynroh haduh ba u la kdiah ka kjat shilliang bad hadien ka jingiohbat, ki paidbhur ki la tied la bom ia u haduh ba u la mynsaw jur.
Ka khubor na ki pulit, ka la iathuh ruh, ba tang mar ia ioh jingtip halor katei ka jingjia, ki pulit na Umiam Police Station ki la leit marmar sha katei ka jaka ban pynlong jingtohkit bad ki la pynkit noh ia u marmar sha Civil Hospital Shillong na ka bynta ka jingsumar kaba kyrkieh ha katei hi ka miet hynrei hadien ba la poi hapoh katei ka jaka sumar, ki doctor ki la pynbna ba u ne u runar u la khlad noh ha ka 4 tarik u Nailur ha ka por 4 baje janmiet namar ka jingmynsaw kaba la jur palat.
Halor ka jingkhlad jong u tei u briew, ki pulit ki la rejister case bad ka jingtohkit mynta kala iaid shakhmat.
