Imphal, Rymphang 11: U President ka kynhun kieng atiar Revolutionary People’s Front (RPF) uba dei ruh u convenor jong ka CROCOM, u Irengbam Chaoren u la khlad noh ha ka 10 tarik mynta u bnai ha ka rta 65 snem.
Katkum ki khubor la ong ba u Chaoren u ba la pyniasoh bad ka RPF ha ka snem 1990, u la ngat ha ka jingpang brain tumor.U la bat kum u president haduh ki sngi jong ka jingiap.
Namar kane ka jingiap jong u chaoren, kane ka kynhun ka la pynhap marshiteng ia ka lama jong ka seng kum ka dak ka jingburom na ka bynta 15 sngi kynthih naduh ka 10 haduh ka 24 tarik mynta u bnai.
U Chaoren u dei napoh Khagempalli Huidrom Leikai, Manipur bad u dei ruh u convenor jong ka CorCom kaba dei ka kynhun jong ki hynniew tylli ki kynhun kieng atiar ha Manipur naduh ba la thaw ia ka ha u bnai Naitung 2011.
Haba kren ha ka lyngkhuh snem kaba 44 jong ka tnat kieng atiar ka RPF ka People’s Liberation Army (PLA), kaba hap ha ka 25 tarik u Nailur, u Chaoren u la ong ba ka jingieit na ka bynta ka burom bad ka jinglaitluid bad ban im kum ka ri kaba laitluid ka dei ka jingphohsniew jong uwei pa uwei ha ka pyrthei baroh kawei.
