Shillong, Jylliew 09 : U MDC barim ka Mylliem bad Nongseng ka seng Federation of Khasi Jaintia Garo People (FKJGP) Bah Sounder Strong Cajee, ula khlad noh hynne ka sngi U Blei ha ka rta ba 58 snem.
U Bah Sounder ula khlad ha Bethany Hospital ha kapor 8 baje mynstep namar ka jingpang kyndet klongsan, ong ka khubor.
U Bah Sounder ula shakri kum u President ka FKJGP naduh u snem 1989 hashuwa ba un jam sha ka jylli sain pyrthei bad long u MDC ka Mylliem Constiuency.
U Bah Cajee u dei ruh u nongseng ia ka seng sain pyrthei Peoples Democratic Movement (PDM) ha u snem 1997 bad ha ka elekshon MLA 1998, kane ka seng kala jop 3 seat.
Wat ha ki snem bala leit noh, u Bah Sounder ula don bynta bha ha ki kam sain pyrthei. Ula iakhun ia ka elekshon MLA 2018 na ka ticket ka NPP na South Shillong hynrei ula shah rem. Ha u 2022 ruh, ula iakhun pyrshah ia u Bah Renikton Lyngdoh Tongkhar na Mawkyrwat constituency hynrei ula shah rem.
