Shillong, Nailur 16: I Kong Kyiek Mukhim, iba dei i Nurse ba la shongthait na ka kam, iba la pyndep ha ka ban iarap pynkha ia palat 1000 ngut ki khunlung ha ka shnong Khrang, East Khasi Hills, ila khlad noh hynne ka sngi Nyngkong ha ka rta ba 88 snem.
Ka jingpynkhuid ia ka met kaba sah jong i kan long ha ka 19 tarik u Nailur ha u lum jingtep jongka Balang Unitarian Kharang ha ka por 12 baje mynsngi.
I Kong Kyiek Mukhim, I dei iba shong basah ha ka shnong ka thaiñ nongkyndong bad ila shongthait noh na ka kam hadien ba ila noh ka rta bad ila lah ban pyndep ia ka jingai jingshakri ha kaban pynkha ia palat 1000 ngut ki khunlung ha ki 62 snem ka jingshakri ka jongi.
La khot ieid ia I da i Kong Kyiek hapoh ka shnong bad ila treikam pura ha ka Kharang Rural Centre (KRC) bad ia ka KRC la seng da ka Annie Margaret Barr kaba dei ka nongtrei mon sngewbha ban shakri ia ka imlang sahlang.
I kong Mukhim, idei I kmie jong ki 6 ngut ki khun bad idei iwei na ki khynnah pule iba la shah ting (Adopted) ha ka Annie Margaret Barr ha ka Rural Centre ha u snem 1952.
Ila leit ban pyndep ia ka jingpule, Nursing Training bad Internship ha Shillong Civil Hospital, Ganesh Das Hospital bad ka TB Hospital na ka bynta 3 snem bad hadien kane ila leit trei ha ka KRC.
I kong Mukhim ila ia shongkurim bad u Bah Dranwell Wahlang ha u snem 1957 ha ka por ba I lah don 20 snem ka rta.
Ka shnong Kharang kaba jngai kumba 20 Km na ka nongbah Shillong, ka don 352 tylli ki longing bad ka jingdon paid ka long 2117 ngut ki briew katkum ka khanasamari jong u snem 2011.
Ki shnong kiba marjan kiba kynthup iaka Pingwait, Mawlein, Dienglieng, Nongjrong kiba don palat 800 tylli ki longing ki don kumba 6000 ngut ki nongshong shnong.
