Nongstoin, Nailur 17: Ka jingiakop khwai dohkha ha pung Pamphyrnai West Khasi Hills ka la wanrah pynban ia ka khubor ba sngewsih, ha kaba tang na ka daw ka jingsahkut jong ka kali bad khlem poi jaka sumar ha ka por ba biang, kawei ka longkmie ka la hap ban kha khun hapoh ka kali bad tang hadien katto katne por I khunlung I la khlad noh.
Kane ka jingjia ka la jia ha ka sngi saitjain ha katei ka jaka, ha kaba ki rawon na kylleng ki jaka ki la tuid sha katei ka jaka iakop khwai bad la ong ba hadien ba la pynbna ia ka tiket jong ka lucky draw ha ka por 2 baje ei ei, shilynter jong ka surok bah National Highway kaba don harud jong katei ka pung, ka la dap da ki paidbah bad ki rawon kiba la ia mih sha surok bad wanrah ia ka jingsahkut kali kaba la neh da ki bun bun kynta haduh da kem iong rein syndon.
Ka jingsahkut ki kali kiba iaid ba ieng lyngba kane ka surok, ka la wanrah ia ka jingbitar sha ki nongleit nongwan kiba la sahkut da ki bun kynta hapdeng surok. La ong ruh ba ka jingsahkut ki kali ka dei namar ka jingshlei da ki kali ha ki arliang ki bynta ba sharud jong ka surok. Kumta ki kali kiba mih bad ba thmu hiar sha Nongstoin ki la sahkut.
Kaba kham sngewsih eh ka long ia ka jingjia kaba la jia ia ka longkmie ba armet lem bad kiba haiing kiba la sahkut ha kane ka jaka namar ka jingkhang lynti ki paidbhur ia ka Ambulance ba kit ia kane ka Longkmie. Hynrei naduh Nongspung katei ka kali ka la shu ieng sah ha kaba ka la pynlong ia ki ar ngut ki rangbah kiba don hapoh kali ban iakren ia ki rawon ban pyllait lem hynrei ki kren heh pynban.
Kumta kim banse ban hap iaid kjat bad leit iakren ia ki pulit kiba don ha Pamphyrnai ban iarap pyllait ia ka kali. Tangba katei ka longkmie ka la dep ban kha ia I khun bad tang hadien katto katne por I khunlung I la khlad noh. Katba ialade pat ka don mynta ha ka jingshitom ba jur ha Holy Cross Hospital, Mairang.
Lah ban kdew hangne ba kane ka jingsahkut block ha surok bah national Highway marjan bad ka pung Pamphyrnai kam dei shuh ka sien kaba nyngkong, hynrei man ka por ba don ka jingpyniakop khwai. Hynrei, ha ka sngi saitjain ka jingbun briew bad ki kali ka la long ar shah bad lai shah ia kaei kaba ju long baroh shikatta. Dei na kata ka daw ka jingsahkut ka leit ka wan ka la long da ki bun bun kynta haduh dad um syndon ka suin bneng.
Ym tang ha Pamphyrnai, hynrei man ki jaka hi jong kane ka surok bah National Highway Shillong Nongstoin, katba don ki jingiakop khwai dohkha kum ka ki thain Kynshi ter ter, ka jingsahkut kali ka neh da ki bun bun kynta. Kane ka ong kaei kaei ka bym lah satia ban pdiang namar ka ktah ia ka leit ka wan ki paidbah khamtam kiba pang ba shitom.
Ka jingkylli ka long hato ki bor District bor Hima bad bor shnong kin shah kin ailad ia kum kane ka jingpynthut ia ka iaid ka ieng ki paidbah, tang na ka bynta ka kamai spah ki nongpyniaid bad ka tamasa jong ki rawon ?. Balei lada ia kwah iakop khwai palat ba kim shu ia leit sha kyndong lane sha wah, balei ban pynthut pyndik ia ki paidbah nongleit nongwan, ia kiba kyrkieh kam khamtam kiba pang ba shitom.
