Nongpoh, Lber 14: Kawei ka samla ka la khlad noh hadien ka jingjia aksiden hapdeng ka scooty bad ka trok kaba la jia ha ka nohphai sngi Saitjain ha National Highway-06 ha ki thaiñ Sumer, Ri Bhoi District.
Katkum ka khubor ki pulit, la iathuh, ba kane ka samla ba khlad ka dei kaba shong ha ka scooty ML 05 AC 2751 bad la u hynmen katba ki dang thmu ban leit phai sha ki thain Nongpoh.
Kane ka samla ka kyrteng ka Retina Hanse (23) katba u hynmen ba niah ia ka scooty u kyrteng u Celestial Hanse (27) kiba dei naka shnong Khamar, Ri-Bhoi District.
Ki Pulit ki iathuh ba kine ki shipara kila shah syllad ha kawei ka trok JK 02 BS 0445 marjan ka lad jong ka surok Western Bypass ha Sumer.
La iathuh ruh, ba ha kane ka jingjia, u nongñiah jong ka scooty u la mynsaw malu mala katba ka Retina Hanse ka la mynsaw jur bad la rah noh mar mar sha Umsning CHC hynrei ki doctor ki la pynbna ba ka la khlad noh na ki jingmynsaw kiba jur na ki bynta jong ka khlieh.
Na ka liang ki bor pulit ka Umiam hadien ka jingtohkit halor kane ka jingjia, ki la aiti noh ia ka met kaba sah jong kane ka lanot sha ki bahaiing ban leh pat ia ka jinglehniam khatduh.
