Nongpoh, Naiwieng 08: Uwei u nongniah trok ula khlad hashen katba u nongbud ula mynsaw hadien ba ka trok kaba ki shong kala leit tynrah ia u ‘Divider’ bad kala kylla khongpong ha ka surok Umsning Bypass kaba don ha Ri Bhoi District.
Katkum ka khubor ba la iohlum, la iathuh, ba katei ka trok kaba don ia u number AS 01 RC 0613 kaba la kit shi trok u nuit kaba la wan kiew na ka jylla Assam ban leit bret sha ki bynta ka Jaintia Hills ha Meghalaya hynrei na ka jingbym lah tehlakam shuh u nongniah kane ka trok ula leit tynrah shwa ia u Divider bad kala kylla khongpong pat sha shilliang jong ka surok ha Umsning Bypass.
U nongñiah jong katei ka trok uba la khlad ha shen na ka jingshah ban ha katei ka trok, la tip kyrteng kum u Dawni Dkhar na Madur, East Jaintia Hills katba u nongbud uba la mynsaw la tip kyrteng kum u Ericson Swer 24 na Ummulong West Jaiñtia Hills.
Ki pulit ka Umsning Police Station kila leit ban sei ia ka met jong utei u nongniah trok bad la rah noh ia ka met sha Civil Hospital Nongpoh ban leh ia ka Postmortem bad ia u nongbud la phah sumar ha Umsning CHC bad ki pulit ki dang pynlong ia ka jingtohkit halor kane ka jingjia aksiden.
