Nongstoiñ, Naitung 09 : Ka thain Kyrshai, West Khasi Hills, kala khihwin biang mynta da ka jingpyrshah kaba jur ia ka jing thmu ban den ia ka Wah Khri (Kulsi)- ban pyntreikam ia ka Kulsi (Khri) Multi-Purpose Irrigation bad Hydroelectric Power Project ha kane ka wah.
Kane ka project ka dei kaba la mynjur ban pyntreilang hapdeng ka Sorkar Assam bad Meghalaya bad ki Myntri Rangbah ki ar Jylla kila dep iakren pynbeit ia kane ka kam ha ka jingialang ba long dang shen ha Guwahati.
Ka Kulsi Project, kaba la wanrah ha u snem 1997, ka dei ka project pynpoi um sha ki jaka rep bad ka project pynmih bording ha ka Brahmaputra Basin, ka ban pynmyntoi ia ki jaka kiba don ha khappud ka Assam-Meghalaya. Kane ka project ka ban pynmih 55 MW bad ka ban pynpoi um sha ki 26000 hectare ki jaka rep, kala sahut namar ka jingiakajia pud bad ka jingpyrshah u paidbah.
U Bah Stedlang Nonglang, uwei na ki Myntri ka Hima Rambrai haba iakren bad u nongthoh khubor, ula iathuh ba ki paidbah ka thain Kyrshai ba kynthup naduh ki shnong Garo, Khasi bad Rabha, ki pyrshah jur ia kane ka project ban pyntrei hapoh ka wah Khri (Kulsi).
Ula iathuh ba kum u Myntri ka Hima, ula ai jingmut ruh ia u Syiem ka Hima Rambrai, ba ka Him aka dei ban pyrshah ia katei ka jingthmu pyntrei ia kane ka project haba pynpaw “Lada den ia ka Wah Khri (Kulsi), da ki spah hectare ka khyndew jong ka Hima kan sa kylla duriaw”.
Une u Myntri Hima ula ong ba kaba kham ktah jur eh kan dei ia ki jaka rep ba kynthup naduh ki jaka rep kba, ki bri kwai, bri tympew, ki shnong ki thaw bad ki jingdon jingem jong ki paidbah kynthup ki iing ki sem bad kiwei kiwei.
U Bah Nonglang ula pynpaw ba lada ki paidbah ki ieng skhem ban pyrshah ia kane ka project, ka Hima ruh kan ai ia ka jing kyrshan kaba pusa.
- ban pyntreikam ia ka Kulsi (Khri) Multi-Purpose Irrigation bad Hydroelectric Power Project ha kane ka wah.){kind=link}