Shillong, Jymmang 01 : Tang hapoh ka shibnai, haduh saw tylli ki jingkawang patrol bomb kila jia ha Jylla, kaba long pyrshah ia ka Police Station, ka Police Reserve, ka kali Heh Sorkar bad ka Iingsah u Symbud Myntri Rangbah ka Jylla.
Ha ka 3 tarik Iaiong, arngut ki riew runar kila leit kawang petrol bomb hapoh ka Mawlai Police Station ha kaba kawei ka kali Pulit kala pluh bad shah bamduh ha ka ding.
Ha ka 24 tarik Iaiong, kawei ka kali synran (escort) jong u Director ka NEEPCO Major General Rajesh Kumar Jha, kala shah kawang petrol bomb ha ka thain Demthring, kaba hap hapoh ka Madanrting Police Station.
Ha ka 26 tarik Iaiong, ki riew runar kila leit kawang petrol bomb ia ka Iingsah jong u Symbud Myntri Rangbah ka Jylla Bah Sniawbhalang Dhar, kaba don ha Nongmynsong, Shillong.
Ha ka 30 tarik Iaiong, ka Jowai Police Reserve kala shah hiar thma ha ki runar kiba la leit kawang petrol ia artylli ki kali ba pynieng ha phyllaw, kiba kynthup ia kawei ka bos pulit bad ka maruti gypsy shimet jong uwei u Pulit, kaba la iingkhong khait.
Hynrei lyngngoh, ka Tnad Pulit kam pat shym la iohkem iano iano ruh ha baroh kine ki jingjia kawang petrol bomb kat haduh ba thoh ia kane ka khubor,
Kane ka jingjia kawang petrol bomb ba khah khah kala wanrah ia ka jingsngew syier ia ki riew paidbah watla ka jingthom bor ka dang long beit thik tang ia ki Pulit bad ia ki heh Sorkar.
Ka khubor ba dang shu ioh ka iathuh ba sa artylli ki Police Station ha Shillong kila shah kawang petrol bomb hynnin ka shiteng miet lem bad ka Ophis jong ka Meghalaya Government Construction Corporation (MGCC).
Kine ki Police Station ki dei ka Shillong Sadar Police Station kaba don hapdeng eh jong ka Nongbah Shillong lem bad ka Rynjah Police Station.
Kaba phylla ka long ba lada pyniasoh ia baroh kine ki jingjia, la paw shai ba baroh kine ki saw tylli ki jingjia kawang petrol bomb kila jia tang hadien ka jingshah kem jong ki dkhot Sengbhalang haba iadei bad ka jingshah pyniap ki nongbylla bar Jylla ha Mawlai Mawroh bad ha Ichamati.
Ka lah ban don jingiadei bad ka jingkem, ka lah ban nym don jingiadei ruh….hynrei ka jingkylli ka mih ha baroh ki nongshongshnong: Ka dei ka jingbym larkam ki Pulit lane dei ba jem palat ka Sorkar Jylla?.
