Shillong, Nailar 29 : Ki khana puriskam tynrai u Khasi kala khie im biang ha ki dur ba khih hynne ka sngi Thohdieng da ka jingpyni kyrpang ia ka phlim Apot – ka jingiathuh khana shaphang u Tiewlarun, ha Lariti Auditorium, Shillong.
Ia kane ka jingpyni phlim la pynshongkun da ka jingiadon ryngkat u Myntri ki kam Jngohkai ka Jylla Bah Paul Lyngdoh.
Haba ai jingkren, u Myntri ula kren halor ka jingkongsan ki jingiathuh khana ban pynneh pynsah ia ka kolshor bad ka jingithuh kyrpang jong ka Jaidbynriew.
Ula ai khublei ia ki kynhun kiba don bynta, kynthup ia u Bah Raphael Warjri bad ki tynshop ki puron jong kane ka phlim.
U Myntri ula pynpaw ba kane ka project (phlim) ka dei kaba jop bad pynpaw ia ka jingsngewskhem ba ka don ka lad ba kan ioh ia ka jingithuh hapoh ka Ri bad shabar Ri ruh kumjuh. Ula iaroh ia ka rukom pynwandur ia ka jingiathuh khana shaphang u Tiewlarun ha kane ka phlim, da kaba ong ba la leh hok ia kane ka khana puriskam kaba la iathuh khana pateng la pateng.
U Myntri ula pynpaw ruh ba kane ka project kan dei shisha kaba ai mynsiem ia ki nongshna phlim ba dang shu sdang jong ka Jylla.
La pynshong nongrim ia kane ka phlim ha ka khana puriskam tynrai u Khasi kaba dei shaphang u Tiewlarun, u syntiew ba la khang ban kheit namar ka jingngeit ba un wanrah ïa ka nemsniew. Ka phlim ka ïathuh ïa ka jing ïathuhkhana kaba sngewsih jong uwei u hynmen bad ka para, kiba lait im tang para maki na kawei ka shnong kaba la shah ktah ha ka khlam.
Ka para khlem da pynsngap ne saitlah ia ki jingmaham u hynmen, kala leit kheit ia u tiewlarun bad ka jingjia ba sngewsih kala wan hap ha ka bad hangne ka pyni ia ka jingieid, ka jingduhnoh bad ka nusib bala thoh ia kaei kaban jia.
