Imphal, Jylliew 14: Ka khubor ki shipai hynne ka sngi Balang ka pyntip ba haduh 9 ngut ki briew kila iap kynthup kawei ka Longkmie bad bun ngut kila mynsaw jur na ka jingkhie biang ka thma iapher jaidbynriew ha Manipur, ha kine ki arphew saw kynta bala leit noh. Kane ka jingjia kala jia hynnin ka miet ha ka thain Khamenlok.
Kito kiba mynsaw na kane ka jingshah hiar thma, la pynkit noh sha ki hospital ba marjan ba kin ioh jingsumar. Ka khubor ka iathuh ba kito kiba iap ki dei kiba shu shah mait da ka wait kynthup ruh kiba shah siat da ki ktang suloi.
U Shivkanta Singh, Superintendent of Police ka Imphal East ula pyntip ba ka jingleh post mortem ia kito kiba iap ha kane ka jingshah hiar thma, ka dang iaid shakhmat.
Kane ka jingkhie biang ka kam iaumsnam kala wan kum ka umsaw ia ki paidbah ka Jylla bad ka Sorkar kiba la pyrshang katba lah ban wanrah pat ia ka jingsuk hapoh ka Jylla.
Ka Khamenlok ka dei kaba don ha khappud ka Kangpokpi bad ka Imphal East District.
Ha kine ki khyndiat sngi bala leit, bun ngut ki briew kila iap bad bun hajar ngut kila phet sha ki jaka sah ba shipor bala pynkhreh da ka Sorkar bad ki bor shipai.
