Imphal, Jymmang 22: Ka jingkulmar na ka jingiakynad pher jaidbynriew kala khie biang ha ki katto katne ki bynta jong ka sor Imphal, Manipur hynne ka sngi Nyngkong.
Kat kum ka jingiathuh ki Pulit, katto katne ki runar ba kieng atiar kila leit sha ka thain New Checkon kaba don ha Imphal East bad byrngem ia ki nongdie dukan ba kin khangdam ia ki shop bad kila wiang ding ia artylli ki Iing. Hadien ba kane ka jingjia kala saphriang, ki paidbah jong kawei ka Jaidbynriew kala mih bad iakhun pyrshah ia kine ki runar. La ong ba ki paidbhur kila tangon jem ia uwei na kine ki runar katba uwei pat ula lait phet.
Kum shibynta ban tehlakam ia kane ka huri hura, ki bor District kila khate noh ia ka kynja ba pynjynsur ia ka korphiw da lai kynta ha Imphal East bad Imphal West District.
Ha ka sngi U Blei, ka Sorkar Manipur kala pynjlan ia ka jingpynsangeh treikam ka kor Internet tad haduh ka 26 tarik u Jymmang hadien ba mih ki jingjia wiangding, thombor bad kiwei kiwei. Ia kine la leh kum shibynta ban khanglad ia ka jingsaphriang ki video hamsaia, ki dur bad ki jingpathai khubor.
Ka Sorkar Manipur kala pynsangeh nyngkong eh ia ka kor internet ha ka 3 tarik Jymmang hadien ba ka Jylla kala sakhi ia ka huri hura bad iaumsnam ha ki 10 tylli ki District, kaba mih hadien ka jingiaid rally jong ki riewlum ban pyrshah ia ka jingdawa ka jaidbynriew Meitei ban ai jingithuh noh ia ki Meitei kum ki Scheduled Tribe ka Jylla.
Haba iakren bad ki nongthoh khubor, u Myntri Rangbah ka Jylla N Biren Singh ula ong ba ka jingsuk kala sdang ban wan phai suki suki ha ka Jylla hynrei kla mih pat ka jingjia ha Imphal East, ha kaba ki runar kila leit byrngem ia ki nongdie dukan da ki suloi arktang. Lai ngut ki briew kila mynsaw malu mala na kane ka jingjia.
“Ki Pulit kila kem ia u runar ba ialam bad kurup ruh ia ka tiar siat na ka met jong u. Ngi la ioh jingtip ba ia kane ka jingjia la kynshoit da u MLA barim. Nalor une u MLA barim, ki don ruh kiwei ki briew ia kiba la kem da ki Pulit ban tohkit” ula ong.
