Shillong, Jymmang 01 : U Myntri Rangbah ka Jylla Conrad K Sangma ha ka sngi Palei, ula aiti ia ka Chief Minister’s Sports Scholarship Scheme sha ki 44 ngut ki nongialehkai jong ki 10 tylli ki discipline ki ban mihkhmat ia ka Jylla sha ka Khelo India Games, 2025.
Ia kane ka scholarship la aiti ha ka jingialang kitbok kitrwiang iaka kynhun ialehkai ka Meghalaya kaba la mih na Jylla ban leit iashimbynta ha kane ka lympung ialehkai ka Ri, ka ban sdang naduh ka 4 tarik Jymmang haduh ka 15 tarik Jymmang ha Bihar.
Kane ka skhim ka thmu ban kyrshan bad pynroi ia ki sap ialehkai ha ka jylla. Ha kine ki hynriew snem ba la dep, ka sorkar ka la bei tyngka ha ki jingtei ia ki jaka ialehkai, wanrah ia ki policy ban ia ka kam ialehkai. Kane ka skhim thymmai kan kyrshan ïa ki nongïalehkai ba kin paw ha ki lympung ialehkai ka Ri bad kan tei ia ka nongrim na ka bynta ka jylla, ka ban pynlong ïa ki National Games ha u snem 2027.
Haba kren ha ka jingialang, u Myntri Rangbah ula ong “Kine ki scholarship ki ai jingithuh ia ka jingtrei shitom bad jingaiti jong ki nongialehkai jong ki, ka ban pynshlur ia ki ba kin ioh ia ka jingjop ba kham khraw bad wanrah ia ka jingsngew sarong ia ka Meghalaya bad ka Ri”.
Haba pynkynmaw ia kaei kaba long ba man, ha ka por ba ka Sorkar MDA ka shimti ia ka jingsynshar ha u snem 2018, u Conrad ula ong ba ki kam ialehkai kila wan shadien namar ka jingbym don ki policy, ka jingbym biang ki jaka ialehkai bad ka jingduna palat ka jingai jingkyrshan ha ka pisa tyngka.
“….ka Sorkar kala shim ia ka sienjam kaba shlur, kynthup ka jingpynim ia ka Meghalaya Games, kaba la pynlong tang 2 sien ha ki 48 snem tad haduh u snem 2019. Ia kane ka lympung ialehkai la pynlong mynta da kaba bujli na kawei ka District sha kawei pat, kaba kyntiew ia ka jingioh bynta lang bad kaba iarap ban shem ia ki sap ialehkai” bynrap u Myntri Rangbah.
Ula ong ruh ba ka Sorkar kala shim ia ka lynti da ka mishon ban tei bad kyntiew ia ki jaka ialehkai ha ki jaka sor bad ha nongkyndong ruh kumjuh, haba pynleit jingmut eh ban wanrah ia ki jingdonkam baroh ha ka liang ka jingkilan met, ki stadium bad ki madan ialehkai ha ki shnong ki thaw.
U Myntri Rangbah ula shim ruh ia ka kabu ban pyntip ha ka jingialang halor ka jingpynkhreh kaba la iaid shaid shaid ban pynlong ia ka National Games ha u 2027 ha Jylla.
