Shillong, Rymphang 19 : Ka Iingkashari Meghalaya High Court kala khein iap noh ia ka ejahar bd ka chargesheet pyrshah ia u Director General of Police (DGP) barim ka Jylla Dr. LR Bishnoi, haba pynpaw ba ki jingkynnoh kim pat biang hakhmat ka ain.
Kane ka mukotduma ka mih na ka ejahar bala mudui ha ka 9 tarik Rymphang, 2024, da u Heh Pulit ba shah sospon Bah Gabriel K Iangrai, uba kynnoh ba u Bishnoi ula pyndonkam bakla bad leh thok ia u registration nombor jong ka kali ba u pyndonkam.
Ka ejahar ka kynthup ia ki jingkynnoh hapoh ka kyndon 409 (ka jingpynkhein ia ka jingshaniah), 467 (ka jingleh thok), 471 (ka jingpyndonkam ia ki kot ki sla thok), 120B (ka jingthmu ban leh thok) jong ka IPC, bad ka kyndon 192 jong ka Motor Vehicle Act.
Hadien ka jingtohkit, tang ka jingkynnoh hapoh ka kyndon 192 jong ka MV Act (pyndonkam ia ka kali khlem ka registration ba thikna) la kynthup ha ka chargesheet bala aiti ha ka 19 tarik Nailur 2024.
U Justice B Bhattacharjee ula ong ba katba u Bishnoi ula pyndonkam da ka kali ba register ha Assam-ka Kia Carnival Limousine, ka Sorkar Meghalaya kala mynjur ban pyndonkam ia ka hapoh ka registration ka Jylla. Hynrei, ym shym la ai satia ia u nombor kali na Meghalaya.
Ka chargesheet kala kynnoh ba ia ka kali la pyndonkam da u nombor ML02-A-0001 kaba dei jong kawei pat ka kali ka tnad, hynrei ym shym la don sati aka kabu kaba pyni ba u Bishnoi u bthah ia kane.
Nalor kane, la shem ba ka kyndon ka Tnad Transport ka long kaba iapher kawei na kawei. Katba ia ka kali la ai jingmynjur ban pyndonkam ia u nombor ka Meghalaya, kam shym la kren shai ruh ia uei uta u registration nombor, kaba pynlong ia ka jingkynnoh ka bym shai.
Ka Iingkashari kala ong ba ka kyndon 192 jong ka MV Act ka dei ka non-cognizable offence, kaba mut ba ki pulit kim lah ban tohkit lane file chargesheet khlem da ioh ia ka jingmynjur na u Magistrate. Naba kam shym la don ka jingshim jingmynjur, kane ka chargesheet kam ieng satia kat kum ka kyndon 155 (2) jong ka CrPC.
Ka Iingkashari kala shim khia ruh ia ka jingkam u Bishnoi ba ka ejahar ka dei kaba la ujor da ka jingthmu eiei ha lyndet naba u nongmudui, GK Iangrai u dei uba la shah sospon bad ngat ha ki jingtohkit kiba bun ha ka por ba long DGP u Bishnoi.
Haba pynkut ha ki jingkynnoh ki dei ki bym don nongrim bad ki bym iaid kat kum ka rukom, ka Iingkashari kala khein iap noh ia ka ejahar bad ia ka chargesheet haba pynkut syndon ia kane ka mukotduma.
