Nongpoh, Nailur 12: Ki bor pyniaid District ka Ri Bhoi, hynne ka sngi Ba-ar kala khang tala ia kawei ka khyrdop khrong khajna bala pynieng da ka Khasi Hills Autonomous District Council (KHADC) ha surok National Highway-6, ha Shnong Umdihar.
Ki jingkynnoh kila mih ba kane ka khyrdop jong ka KHADC ka dei kaba la shu pynieng beain ban lum khajna ia ki kali kit mar kit mata bapher bapher khamtam ia ki kali ba niah da ki bar Jylla.
Dang shen, ka kynhun ki trai kali bad nongniah kali kila pynpaw ia ka jingsngewkhia kaba jur halor ka jingmih ki khyrdop khrong khajna ki bym ithuh ithaw ha shilynter ka surok bah National Highway-6, kaba la ktah ia ka kamai ka kajih jong ki.
Kane ka kynhun kala leit buh ruh da ka jingujor sha ki bor ba dei khmih ka KHADC bad ruh sha ki bor District ba kin shimkhia mardor ia ka jingmih kane ka khyrdop ha Umdihar.
Haba ioh jingtip ia kane, u Deputy Commissioner ka District hynne ka sngi Ba-ar, ula pynmih ia ka hukum ban khang khyrdep noh ia kane ka khyrdop ka KHADC.
Halor kane ka hukum, ki Magistor bala synran lang da ki Pulit ka District, kila leit ban khang tala noh ia kane ka khyrdop.
Lah ban kdew hangne b aka Ministry of Road Transport & Highway, kala khang pyrshah ia ka jingbuh khyrdop ha shilynter ki surok National Highway hapoh ka Ri khlem da ioh jingbit.
