Shillong, Lber 06 : Ka North Eastern Hill University Students’ Union (NEHUSU) bad ka Khasi Students’ Union (KSU) ha ka sngi Palei, kila khang tala ia ka Ophis treikam u Vice Chancellor Prof PS Shukla kum ka dak ka jingpyrshah ia u ban shimti biang ia ka kam hapoh ka skulbah.
Kane kala wan jia hadien ba u Prof PS Shukla ula kam dang shen ba ula shimti biang ia ka kam kum u Vice Chancellor ka NEHU ha ka 3 tarik u Lber.
Kine ki seng jong ki samla pule kila khang khyrdep ia ki khyrdop jong ka skulbah ban pynthikna ba um dei ban shah ia u Prof Shukla ba un wan rung shapoh ka phyllaw.
Kila iai ban ia ka jingdawa ba dei ban weng noh mardor ia u Prof Shukla, namar ka jingkynnoh ba u donkti halor ki kynrum kynram hapoh ka skulbah.
Haba pynpaw ia ka jingsngewkhia, u President ka NEHUTA Prof Lakhon Kma ula ong ba ha ka histori ba lah san phew snem jong ka skulbah, kam pat ju don ka jingjia ba kum kane ka jingkam ban shimti biang ia ka kam da ka durkhih haba u briew um pat wan treikam na ka shuti kaba u Prof Shukla ula shim naduh kine ki laibnai shiteng.
“Ka NEHUTA ka shem ba kum kine ki jingkam ki dei ka jingshet kylla ia ki rukom treikam bad ki rule jong ka skulbah khamtam ia kum une u VC uba bakla lut ha ki jingtreikam bad uba la pynhiar ia ka kyrdan jong ka NEHU na ki kam bakla jong u, kaba dang don mynta hapoh ka jingtohkit” ong u Prof Kma.
