Nongstoin, Nailur 22 : Ka Hynniewtrep Youths Council (HYC) West khasi Hills ryngkat ka Dorbar Shnong Riwiang, hynne ka sngi Thohdieng, kila hiar khang tala ia ka Ophis jong ka karkhana Ferro Alloy kaba don ha Riwiang namar ka jingsuba shah rahbor kawei ka Longkmie ha u nongtrei kane ka karkhana uba dei u bar jylla.
Ka HYC bad ka Dorbar Shnong kila shim ia kane ka sienjam halor ka jingjah jong kawei ka Longkmie ia kaba la suba jur ba ka shah rahbor ha uwei u nongtrei ka karkhana.
Kat kum ka khubor Pulit, kane ka Longkmie kaba jah ( la buhrieh kyrteng) ka dei na ka Shnong Riwiang. Kane ka longkmie kala jah naduh ka 16 tarik Nailur.
Ki Pulit ki iathuh ba ki bahaiing hasem ki suba jur ba kane ka Longkmie kala jah bad uwei u briew ba kyrteng u Mridul Boro, uba trei ha ka Shakhambari Ferro Alloy Company, Riwiang.
Ki Pulit ba ki bahaiing hasem kila ujor da ka ejahar halor kane ka jingjah kane ka longkmie.
Ka Dorbar Shnong ka iathuh ba ha ka 20 tarik Nailur, ka Shnong kala leit ban khang tala ia kane ka karkhana halor ka nongrim ba ki bor pyniaid kim shym la lah ban tehlakam iala ki jong ki Nongtrei.
Ka Shnong kala buh kyndon ba ki bor pyniaid kim lah ban plie ia ka karkhana katba kim pat lah ban wan ialam noh ia kane ka Longkmie bad ia une u briew hynrei la kynnoh ba ka karkhana kala kyndang noh ia kane ka tala ha ka sngi kaba bud.
Namar ka jingshem ia kane, ka Dorbar Shnong kala kyrpad ia ka HYC-West Khasi Hills ban wan tuklar bad ban iarap lem ia ka Dorbar Shnong ha kaban khang tala ia kane ka karkhana.
U President ka HYC Samla Lumlang Kharsyiemlieh ula ong ba ka Shnong kala kyrpad ia ka Seng ban iarap bad ka Seng ka ai ka jingkyrshan ba pura ia ka Dorbar Shnong haba maham ba kane ka kompani ka dei ban wan ialam shuwa ia katei ka Longkmie ba jah lem kumta kan ym iohlad satia ban plie biang ia ka karkhana.
Ka HYC kala maham jur ruh ia ki bor pyniaid ka kompani ba kim dei ban plie ne kyndang ia ka tala katba kim pat lah ban pynurlong ia ki kyndon bala buh.
Pule lang ia kane: Dawa ka VPP ban leh tyngeh ia ki kam dawa pisa ba kiew dor ki mat ki mata ha Jylla
Peit lang ia kane
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai
