Nongstoiñ, Lber 12: Ka All Meghalaya Truck Owner & Driver Association (AMCTODA) ha ka 10 tarik Lber ha ryngkat ki nongniah trok, kila leit ban khang tala ia kawei ka karkhana coke kaba don ha Shallang namar ka jingkynnoh lehmeng jong u trai kane ka karkhana uba dei u bar Jylla hynrei uba la pynkylla jait Khasi jubor sha ka kur Sohbar.
Ki Nongialam ka AMCTODA bad ki nongniah trok kila leit ruh sha ka Ophis treikam jong une u trai uba kyrteng u Dharmu ban iakren hynrei la pyntip ba une u trai ula phet krad na kane ka jaka mar syn ioh jingtip ia ka jingwan jong kane ka kynhun bad bthah ia ki manager ba kin iakren pynbeit ia kiei kiei baroh.
Ha kane ka jingiakren bad kine ki Manager kaba la slem bha, kala poi pynban sha ka jingiania kaba jur bad kala jan poi ruh wat haduh u pud ka jingiasyndong kti bad kine ki manager kiba dei ki bar jylla lada kim kloi ban pyndem.
U bah Mosklandar Marngar President ka AMCTODA u la iathuh ba ka jingwan hiar iakynduh ia u Dharmu ka dei namar ka jingpynkhein ia ki jingkular kiba ula dep ai sha ka Association bad ki Nongniah Trok haba iadei bad ka dor ka mur ban kit ia u coke.
“Ha u bnai Kyllalyngkot, ngi la ïa kynduh ïa u Dharmu ban ïapynbeit ba ïa ka bai kit ïa u coke ha kaba la mynjur ba ka dor ban kit ia une u mar ka dei ban long T.2800 shi metric ton na Shallang haduh Byrnihat bad T. 3000 lada hap ban pynhap ia u mar sha ka jaka ba kham jngai na Byrnihat kum ha Jagiroad bad kiwei kiwei ki jaka” ula ong.
“Hynrei tang katto katne sngi, u Dharmu ula kylla jutang bad ula eh kat kaba u mon khlem da burom ia kaei kaba la iakut bad kular” ula bynrap.
U Bah Moslander ula ong ba ki Association bad ki Nongniah Trok kila bitar lep ia une u trai ka karkhana coke, kaba la lam sha ka jingleit khang tala syndon ia kane ka karkhana coke.
U Bah Moslander ula iathuh ruh ba ki Nongniah trok kila bitar ia u Dharmu ym tang ba u pynkhein ia ka kular hynrei kila bitar ruh namar ka jingkhnoit bein ia ki da kaba siew kat kaba u mon ia ka bai kit mar.
“Teng teng u siew tang T.1000 shi metric ton bad ten gteng u siew tang T. 2000 bad don ruh ki khep ba um ai wat tang shi tyngka ruh. Ki don ki khep ba u beh ia ki nongniah trok kiba leit pan ia ka bai kit mar na ka Ophis jong u” ula kynnoh.
Ha kane ka sngi ba leit khang tala ia ka karkhana, ka Association kala lap ruh ba bun bah ki nongtrei kila wan ialam ia ki lok bad ki khun ki kti ban pynsah ha katei ka jaka bad kaba isangsot eh ka long ba ki Khunlung bad ki Khynnah rit ki iathiah ha madan bad ring mynsiem da ka tdem kaba mih na ka jingthang dewiong.
Halor kane ka jingshem, ka Association kala dawa na ka Sorkar ba kan shimkhia bad leh eiei na ka bynta ka koit ka khiah bad ka jingshngain nalor ban iada iaka hok jong kine ki Khunlung Khynnah.
