Nongpoh, Naitung 26 : Ka ophis u Deputy Commissioner, Ri Bhoi District ka la pynmih syndon da ka hukum ban khang pyrshang ïa ka jingpyndonkam ïa ki plastic shisien pyndonkam (Single Use Plastic) ha baroh kawei ka district khamtam ha ki dukan, ki ïew ki hat baroh naduh ba la pynmih ïa kane ka hukum.
Kane ka hukum, ka long ruh shibynta ban burom ïa ka jingpynbna lyngba Deputy Secretary ka sorkar jylla Meghalaya, kaba la pynbna ruh ban ai jingpynshai paidbah halor ki jingma kiba lah ban mih na ka jingpyndonkam bad bret pathar ïa ka plastic kaba lah ban ktah shikatdei ïa ka mei mariang.
Halor kane ka hukum, na ka liang ka Nongpoh Town Committee, lyngba u Secretary Bah Rayonald Kharkamni, u la pynbna ruh ba ïa kane ka hukum yn pyntreikam ruh ha baroh kawei ka sor Nongpoh, khamtam ha ki ïew ki hat bad ki dukan kiba don ha kane ka thaiñ, ha kaba la mana ban pynduh ïa ka jinypyndonkam ïa ki plastic haba die ïa kino kino ki mar ne ki marbam mardih.
La pyntip ruh, ba lada dang lap ba don ki dukan kiba dang pyndonkam ïa ki plastic kin sa shah pynngat ha ki kyndon aiñ katkum ka jingbthah ka sorkar jylla.
