Nongpoh, Jymmang 16 : Ki bor pyniaid District ka Ri-Bhoi, hynne ka sngi Thohdieng, kila khang khyrdep ia kawei ka khyrdop lum khajna jong ka Khasi Hills Autonomous District Council (KHADC), kaba dang shu pynieng dang shen ha surok NH-06 ha Umdihar.
Ka bor District kala shim ia kane ka sienjam halor ka nongrim ba ia kane ka khyrdop la pynieng be-ain ha surok NH-06 bad kala khrong pisa haduh T.200 na kawei ka trok kit mar kiba iaid lyngba ka khyrdop.
Kane ka khyrdop jong ka KHADC kaba la pynieng da ka Tnad Trade, ka dei kaba dang shu plie dang ha kine ki khyndiat sngi-kaba pynmih ia u dak jingkylli ba hato ka dei ka khyrdop ba ai jingbit ban pynieng da ka Executive Committee ka Voice of the People Party (VPP).
Kat kum ka jingiathuh ki bor District, ka jingpynieng ia ki khyrdop ha ka suroh National Highway ka dei kaba hap ban da ioh jingbit na ka Ministry of Road Transport & Highway (MoRTH) ka Sorkar Pdeng.
Haba iakren bad u Deputy Commissioner Abhilash Baranwal ula pynthikna ba ki bor District kila shim ia kane ka sienjam namar ka KHADC kala iaid lait ban pan jingbit haba pynieng ia kano kano ka khyrdop khamtam ha ka surok National Highway.
Ula bynrap ba kino kino ki kynhun ne riew shimet kin ym lah ban buh khyrdop lum khajna ha ki surok National Highway ne wat ki surok PWD khlem da ioh jingbit na ki bor ba dei khmih.
, kaba dang shu pynieng dang shen ha surok NH-06 ha Umdihar.){kind=link}