Shillong, Iaiong 20 : U Chief Executive Member (CEM) ka Khasi Hills Autonomous District Council (KHADC) Bah Titosstarwell Chyne hynne ka sngi Palei ula hukum ba dei ban leh da kaba tyngeh mar dor ia ki nongkhaii bar jylla kiba khaii pateng khlem da don iaka Trading License ha Iewduh, kaba dei ka Iew kaba heh duh ka Jaidbynriew Khasi haka jylla.
Katei ka hukum u CEM kala mih hadien ba ka KHADC kala pynlong ia ka jingkynra iaka Trading License bad lap ba bun ki dukan jong ki bar jylla kim shym la shim iaka Trading License na ka Council. Bun tylli ki dukan kila shah kang khyrdep ha katei ka jingjurip.
Ia katei ka kynhun jurip la ialam da u Bah TW Chyne ha ka jingiadonlang ki Executive Member, ka tnad Enforcement bad ka ophis jongu Syiem ka Hima Mylliem.
Haba iakren bad ki nongthoh khubor u Bah Chyne ula pynpaw ia ka jingsngewkhia ban iohi ba ki briew kiba nabar ki khaii pateng be-aiñ hapoh u pud u sam jong ka Council.
“Dei namar kane ba nga la bthah iaka tnad Enforcement ba kadei ban leh da kaba tyngeh pyrshah ia kitei ki briew namar ba kim don iaki kot ki sla kiba biang kynthup iaka Trading License” ong u Bah Chyne.
“Ngi la dep ban jurip ia ki katto katne tylli ki dukan bad lap ba kitei ki dukan ruh kim shym la don ia ka Trading License. Ngin sa ai da ka show cause ia kitei baroh bad ngin sa shi mai ki sienjam kiba tyngeh wat ban poi haduh u pud ban khang kyrdep syndon ia ki dukan jongki” ong u CEM ha ryngkat bad ka pynbna ba dei ban pynlong iaka jingjurip kaba man la por ia ki dukan jong ki bar jylla kiba khaii pateng be-aiñ.
Halor ka jingkylli, u CEM ula ong bay m kwah ban kynnnoh iano iano ruh hynrei ula kyntu ia baroh naduh na u Syiem ka Hima Mylliem, ki Myntri bad kumjuh ki pulit Enforcement ba kidei ban shimkhia bha ia katei ka kam.
“Nga pynthikna ba ka Executive Committee kan shimkhia bha ia kane ka mat bad ban pynthikna ba ka tnad Enforcement kadei ban trei pura iala ka kam ha kaban pyntreikam iaka Trading by Non-Tribal Regulation Act, ia kaba ngim lah ban shu ailad ia ki briew kiba nabar ba kin wan ban leh ia ki kam khaii pateng ha ka jaka ka jong ngi khlem da ioh iaka trading license. Haba nga ong kumtei, kam mut pat ba ka EC ka kwah ba baroh ki bar jylla kidei ban ioh iaka trading license hynrei ka jingthmu hi ka long ba dei ban pynduna iaka ban pynthikna ba ki briew ki jong ngi kin ym shah ktah iaka jingkamai jakpoh ka jong ki” ula ong.
Ha kaba iadei bad kawei pat ka jingkylli, u Bah Chyne ula ong, “Ba ym lah ban rah iaka suloi khlem ka lisen. Ngi hap ban aplai iaka lisen nangta ngin sa thied ia ka suloi ne ngan ym lah ban niah iaka kali khlem da ioh shwa iaka permit, kumta ka wan kumjuh bad ka khaii pateng ruh, kaba mut ba kitei ki briew kiba nabar kim lah ban khaii pateng khlem da ioh shwa iaka trading license. Kumta ka jingkhaii ka jongki ka long kaba be-ain bha khlem da ioh iaka trading license bad namar kane, ngin pynthikna ba ki briew ki bym shim la aplai ia ka trading license kin ym ioh iaka trading license namar ba kila dep pynkhein ia ka ainamar ba kila dep pynkhein ia ka aiñ.”
Nalor kane u CEM ula pyntip ba ula pan iaka kaiphod ban pynthikna ba ki bar jylla kim dei ban ioh shong die madan ha Iewduh lait noh tang ia kito kiba la ioh iaka trading licenses.
“Nga kyntu ia u EM Trade ba udei ban khang khyrdep ia baroh ki jingkhaii pateng be-aiñ kiba don hapoh ka Iewduh,” ula ong.
Haba u CEM bad ka kynhun leit jurip kila dep ban bthah ia ki dukan kiba don ha Kimlee Building ba kin khang khyrdep namar ka jingbym don iaka Trading License, hynrei u trai jong katei ka Building u Paul Leong ula bthah ia ki nongshong dukan ba kidei ban plie biang ia ki dukan jongki bad ula byrngem ban phah kem kylla ia ki pulit Enforcement katkum ka lynti jong ka Aiñ namar katei ka building ka dang don hapdeng ka jingshah tian bishar ha ka iingkashari.
U Paul Leong ula ong, haduh mynta ym pat la ai, ia kano kano ka rai la kane ka Kimlee Building ka hap ha u pud u sam jong ka Shillong Municipal Board ne Khasi Hills Autonomous District Council, kumta kam long kaba iahap ba ka Council kan leit khynra Trading License na katei ka Building.
Katba u CEM ka KHADC ula iengskhem ba ki nongshong dukan kidei ban don beit iaka Trading License haba ki shong die jingdie hapoh u pud jongka Council bad ula iathuh ba u Paul Leong yn wan ban iakynduh ia u ha ka 21 tarik u Iaiong ha ophis jong ka KHADC bad ula bthah ba dei ban wanrah ruh iaka hukum kaba la pynmih da ka iingkashari.
