Aizawl, Naiwieng 26 :Ka sorkar Mizoram kala shim ia ka rai ban khang pyrshah ha kaba iadei bad ka jingpynbthei bom pataka, ban pynher ia ki rosni ne sky lantern lane kiwei pat ki jingpynsawa kiba kynthup ia ki suloi kai ha ka sngi Khristmas bad Snem Thymmai ki ban sa wan.
U Superintendent of Police (SP) ka Aizawl, u C Lalruaia ula ong ba ia ka hukum ban khang die ia bom pataka, ki sky lantern, ki suloi kai ryngkat ki kuli lem bad kiwei pat ki kynja jingpynbthei la pynmih da ki Deputy Commissioner jong ki district naduh u bnai ba la dep.Ula ong ruh ba ia kine la khang pyrshah ruh ha kane kaDiwali ba la dep.
U SP ka Aizawl ula ong ruh ba la thaw ia ki kynhun ba kyrpang na ki tnat pulit ban pynlong ia ki jingtalasi hapoh ki dukan bad ki kudam hapoh ki district.
Ha kajuh ka por ula kyntu ruh ia ki paidbah ba kin kiar na kaba pyndonkam ia ki bom pataka bad kiwei pat ki tiar pynbthei na ka bynta ban ialehkmen khnang ban pyllait na ka jingjakhlia jong ka lyer bad ka mariang.
“Ha kine ki sngi Khristmas bad Snem thymmai ban wan yn shim ia baroh ki sienjam kiba pyrkhing ban pynthikna ba kan ym don kano kano ka jingpyndonkam ia ki bom pataka bad kiwei pat ki tiar pynbthei,” ong u Lalruaia ha ka jingialang bad ki lad pathai khubor ha ka 24 tarik mynta u bnai.
Ha ki snem kiba la dep ruh ka Mozram ka ju khang pyrshah ban pyndonkam ia ki bom pataka, ki sky lantern bad kiwei pat ki tiar pynbthei ha ki sngi Khristmas bad Snem Thymmai khnang ban tehlakam ha kaba iadei bad ka jingpynjakhlia ia ka lyer bad ka mariang.
