Shillong, Naiwieng 22 : Ka Sorkar Jylla hynne ka step sngi ba-ar kala pynmih ia ka hukum ban khang ia ka kor internet ha baroh 7 tylli ki District ka Ri-lum Khasi bad Jaintia kum ka sienjam ban tehlakam ia ka jingpynsaphriang ia ki khubor hamsaia halor ka jingjia Mukroh lyngba ki rynsan Social Media.
Ia kane ka hukum la pynmih da u Secretary ka Tnad kam Pohiing (Police) ka Jylla Bah CVD Diengdoh haba pyntreikam ia ka kyndon 5(ii) jong ka Indian Telegraph Act, 1885, pule lang bad ka Temporary Suspension of Telecom Suspension ( Public Emergency or Public Safety) Rules 2017.
Une u Heh Ophisar ula pyntip ba la khang ia baroh ki rynsan pathai khubor jong ki Social Media kynthup naduh ki dur, ki video lane ki jingthoh kiba ju pynsaphriang lyngba ka Whatsapp, Facebook, Youtube bad kiwei kiwei ha kine ki 48 kynta kaba sdang naduh ka por 10:30 baje mynstep jong ka sngi ba-ar.
Ula ong ba ka jingpynkhein ia kane ka hukum kan khring ia ka jingpynsajia hapoh ka kyndon 188 IPC bad ruh kat kum ki kyndon ba iahap jong ka Indian Telegraph Act 1885.
