Shillong, Naiwieng 22 : Ka Sorkar Assam kala khang mynta ia baroh ki kali kiba don ia u nombor Assam kynthup wat ia ki kali kamai Tourist ba kin wan kiew sha Meghalaya namar ka jingsheptieng ioh mih ka jingiaumsnam na ka jingjia hynne ka step ha Mukroh.
Haduh hynriew ngut ki nong Mukroh kila iap bad bun ngut kila mynsaw jur na ka jingther kuli jong ki Pulit Assam hynne ka step por 7 baje. Kane ka jingjia kala mih hadien ba ki paidbah ka shnong Mukroh kiba pyrshah jur ia ka jingwan ki Pulit Assam ban kem ia ki nongshongshnong ka thain.
Kat kum ka khubor, ki Pulit ka Assam kila ieng pahara naduh hynne ka step ha Jorabad bad kila khang lut ia baroh ki kali Assam kynthup ki Tourist ban wan kiew sha Meghalaya.
Haba iakren bad ki Heh Pulit ka Assam, la ong ba ia mynta hi kim pat shah ia ki kali Assam bad ki kali Tourist ba kin wan rung sha Meghalaya namar ioh don ka jingshah thombor kum ka jingkput ia ka jingjia ha Mukroh.
Kila ong ba kane ka jingkhang ka dei kaba la leh na ka bynta ka jingshngain jong ki nongleit nongwan ki bym dei ki briew na Jylla Meghalaya khnang ban lait na kino kino ki jingjia kiba sngewsih.
U Nongaikhubor ula pyrshang ruh ban iakren ia ki nongleit nongwan khamtam ki nongniah kali tourist kiba ju wan kamai sha Meghalaya bad iathuh ba ki Pulit ka Assam kila phah phai noh ia baroh ki kali na Jorabad bad phah pynhiar ia ki passenger ha shiteng lynti.
Ki nongniah kali tourist kila pynpaw ba kane ka jingleh ki Pulit ka Assam ka dei ka bym iahap satia namar kim dei ban pynsajia ia kiba kamai jakpoh tang na ka jingleh jong ki Pulit ha Mukroh. Kila ong ba kane kan sa ktah jur ia ka kam jngohkai ha Meghalaya namar ka jingkhang lynti jong ki Pulit Assam.
