Shillong, Jymmang 06: Ka Meghalaya State Pollution Control Board (MSPCB) ka la pyndam noh shipor iaka ‘Consent to Operate’ jong ka M/s RNB Carbide & Ferro Alloys Pvt Ltd na ka bynta 45 sngi lane tad haduh ba yn pynbha pura ïa Ki kor Pollution Control Device (PCD).
Kane ka rai ka long hadien ka jingjurip jong ki heh ka MSPCB ha ka 24 tarik Iaiong hapoh ka Ferro Silicon Manufacturing Unit kaba don ha Umiam Industrial Estate, Ri Bhoi.
Haka jingjurip la lap ia ka jingmih lyer jaboh kaba jur na ka Stack bad ki jingbym iahap ak rukom treikam ka kor Online Continuous Emission Monitoring System (OCEMS).
La lap ba ka PCD ka dang treikam, hynrei ka Company ka la pyntip sha ka MSPCB ba mynta ka dang don ha ka jingpynbha bad ka la pan por 45 sngi ban pyndep ia ka kam.
Ha jubab iaka jingpan por ka Company, u Member Secretary ka MSPCB u Dr GH Chyrmang ka la pynmih ïa ka jingbthah kaba thikna katkum ki kyndon Section 33(A) jong ka Water (Prevention and Control of Pollution) Act, 1974 bad Section 31(A) jong ka Air (Prevention and Control of Pollution) Act, 1981 daka ba pyndam shipor iaka Consent to Operate jong ka Company.
“Ka jingpyndam shipor kan treikam haduh 45 sngi lane tad haduh ba la pynbha pura ïa ka PCD, la test ïa ka jingtreikam kaba biang, bad la aiti ïa ka kaiphod jong ka jingbud ryntih sha ka board” ong ka shithi.
U Dr Chyrmang u la maham ba lada ym bud ia katei ka jingbthah, ka Company ka lah ban shah pynngat ha ka ain katkum ki kyndon Water and Air Pollution Control Acts.
Lah ban kdew ba ka Company kala ioh jingmynjur nyngkong lane ka Consent to Operate haka 16 tarik Nohprah 2003 daka ba hukum ba dei ban pynthymmai iaka Consent to Operate bad dang ha ka 3 tarik Jymmang 2024 ka Company kala ioh biang iaka Consent to Operate ban pynmih kaba 10,950 MTPA.
 ka la pyndam noh shipor iaka ‘Consent to Operate’ jong ka M/s RNB Carbide & Ferro Alloys Pvt Ltd na ka bynta 45 sngi lane tad haduh ba yn pynbha pura ïa Ki kor Pollution Control Device (PCD).){kind=link}