Shillong, Naitung 25 : Ka Hima Sohra Tourism Committee (HSTC) kala pynbna ban khang noh ia ka jingpynlong jaka bamkhana, iashet bam sha lum sha wah ha baroh ki jaka kiba hap hapoh u pud u sam ka Hima Sohra.
Kane ka dei kawei na ki sienjam bala shim da ka HSTC ban tehlakam ia ka jingbret niut pathar bad jingtheh niut ha kylleng ki jaka ha shilynter ka surok Mawkdok-Sohra bad kiwei kiwei ki jaka kiba hap hapoh u pud ka Hima Sohra.
Haba kren sha ki lad pathai khubor ha ka sngi Thohdieng, u Nongaibuit ka HSTC Bah Alan West Kharkongor ula ong ba ka jingiabam khana, iashet bam bad iasong bam ban iabam sha lum sha wah, la khang pyrrkhing bha ha shilynter ka surok Mawkdok-Sohra bad kiwei kiwei ki jaka khlem da ioh jingbit na ki Dorbar Shnong.
Ula ong ba baroh ki kali kiba wan rung sha Sohra ki dei ban rah noh iala ki jong ki pla bret niut bad la mana tyngeh ba ym dei shuh ban iabret ia ki jaboh jabain sharud shakiar lane rud surok.
Ula pyntip ruh ba ia ka jingiasah miet (night camping) ruh yn shah noh tang ha ki katto katne ki jaka bala buh da ka Hima, bad la mana tyngeh ban pynlong jaka iasah miet shabar kine ki jaka.
Haba pynlong kongsan ia ki nongwan shangkai ba kin shim ia ki local guide, u Bah Alan ula ong ba ki briew kiba kwah ban leit iaid kjat sha ki jaka ka thain ne trekking kin hap ban shim noh ia ki local guide nangne shakhmat.
Nalor kane,ula pynbna ba ki vloggers, ki nongleh social media, bad ki media channel ki donkam ban ioh shuwa ia ki jing mynjur na ka Committee ban kyntiew ne pynmih ia kino kino ki jaka ba thymmai ne ki bym pat bna paidbah, kiba don hapoh u pud u sam ka Hima Sohra.
Ula ong ba kine ki sienjam ki dei kiba la shim da ka jingthmu ban iada ia ka sawdong sawkun ka mei mariang, ban pynthikna ia ka jingkiew kaba neh ha ka kam jngohkai bad ban pynneh ia ka ioh ka kot ka thain.
“Kine ki sienjam ki dei kiba la pyntreikam ban iada ia ka ioh ka kot ka thain bad ia ka jingitynnad ka mei mariang jong ka thain-ka ban pynthikna ia ka jingroi kaba neh ha ki kam jngohkai hapoh ka thain” ong u Bah Alan haba pan ia ka jingiatreilang jong baroh.
 kala pynbna ban khang noh ia ka jingpynlong jaka bamkhana, iashet bam sha lum sha wah ha baroh ki jaka kiba hap hapoh u pud u sam ka Hima Sohra.){kind=link}