Shillong, Lber 05: Ki bor District ka East Khasi Hills ka la pynmih iaka hukum ba la khang ia ki nongshong shnong ban pynieng khyrdop haki surok jong ka tnat Public Works ha Pepbah, da kaba maham ba katei ka khyrdop ka khang beain ia ka leit ka wan jong ki paidbah bad ka lah ban nang ai ding ia ka jingiakajia jaka.
Ka District Magistrate ka Kong Rosetta Mary Kurbah ka la pynmih ia ka hukum katkum ka kyndon 163 jong ka BNSS hadien ba la mih khubor ba ka shnong Mawlyngad–Pepbah ka la pynieng khyrdop ha surok PWD hapdeng ka jingiakajia pud bad ka shnong Thadan halor ka jaka rep ha Lyntung.
Ka hukum ka kdew ba ka surok PWD ka dei ka surok paidbah bad ba ym don u riew shimet, ka bor synshar shnong, ne ka Dorbar Shnong kaba don ia ka bor katkum ka ain ban khanglad, ne pynbeit ia ka jingleit jingwan jong ki paidbah.
Ka hukum ka khien ba ka jingpynieng khyrdop ka khanglad ia ka jingleit jingwan jong ki paidbah kaba lah buh jingma ia ka shongsuk shongsain.
“Nga khang pyrshah ban pynieng khyrdop ha ka shnong Mawlyngad Pepbah harud ka surok PWD ha ka surok Pepbah bad ailad ïa ka jingïaid laitluid jong ki paidbah jong baroh ar tylli ki shnong” la ong ka hukum.
