Shillong, Naiwieng 13 : Ki bor pyniaid District ka East Khasi Hills, kila khang shipor ia ka jingiaid kamai ki maxi cab SPTS sha ki thain Khyndailad bad Motphran, kum ka jingpyrshang (trial) ba shitaiew, ban peit ia ka jinglong jingman ka jingdheng kali hapoh ka Nongbah.
Kane ka hukum kala sdang treikam hynne ka sngi Nyngkong bad la pyntip ia ka, da ki nongniah jong ki kali maxi cab kiba la leit iakynduh ia u Chief Executive Officer (CEO) ka Shillong Municipal Board (SMB) ban pan jingshai ia kane ka jingkhang kamai ia ki sha Khyndai Lad bad Motphran.
Kila pyntip ba u CEO ula pynshai ba kane ka dei tang ka jingpyrshang ban peit ia ka jinglong jingman ka dheng kali ha sor Shillong. La iathuh ruh ba u CEO u pyntip ba shen un s alum ia ka jingialang bad ki nongpyniaid ia ki kali maxi cab ban iapyrkhat ia ka jingthmu ban pyniaid da ka rukom kamai ba thymmai iaki maxi cab.
Ki nongniah kali kila pynpaw ia ka jingsngewdiaw halor kane ka hukum ba syndet syndet bad ong ba kane kan sa ktah jur ia ka kamai jong ki khamtam ba ka Khyndailad bad Motphrah ka dei ka klongsnam jong baroh kiba kamai kali namar baroh ki paidbah naduh ki nongshong iew, ki nongwan iew, ki samla pule, wat ki nomgtrei sorkar ruh ki shim kali na kine artylli ki jaka.
Haba kylli, ki nongniah maxi cab kila pynpaw ba kim nang satia ban ong eiei halor kane ka hukum ka Sorkar bad kin ap ia ka rai jong ki nongpyniaid ia ki maxi cab ki ban sa iakynduh shen ia u CEO ka SMB.
Ki don ruh katto katne ngut ki nongniah kiba pynpaw ba kan bha ban sangeh kamai shwa shipor tad haduh ba ka Sorkar kala shim da kiwei pat ki rai ban pyniaid ia ki kali kamai.
Haba iakren bad katto katne ki paidbah haki thain Khyndai Lad bad Motphran, kila pynpaw ba kane ka sienjam jong ka Sorkar kan sa ktah bha iaki ba duk, lada ym shah shuh iaki maxi cab lane iaki bos ban kamai sha kine ki thain.
“Ngi ba sah sha ki thain Nongrah, Nongmynsong bad Umpling, ngin shem jingeh bha namar ka jingkamai ki maxi cab bad ki bos ka iarap bha ia ngi ha ka liang ka bai kali bad ka bai kit tiar namar ka bai kali ka duna haba ia nujor bad ki Taksi” ong ki longkmie ba die jhur ha Khyndailad bad Motphran.
Ki paidbah ki pynksan ba kala donkam shisha iaka sorkar ban wad ki lad lynti kumno ban tehlakam iaka jingdheng kali ha Shillong hynrei kila kyntu ruh ba, kano kano la sienjam ba ki shim kam dei ban ktah ia u paidbah khamtam kito kiba kamai mynsngi bam mynmiet.
Kila kyntu ruh iaka sorkar ba kan khmih lang halor ka jingrem palat ka bai Taksi ha nongbah Shillong.
