Tura, Naitung 28 : U Nongialam ki Samla ka TMC bad u briew ba hakti hakjat jong u Myntri Rangbah barim Dr Mukul Sangma, Richard Marak ula kem pang ha ka sngi Balang ha along pulit bad la pynkynriah noh ia ki sha Tura Hospital ba un ioh ia ka jingsumar.
U Richard marak ula shah kem ha ki Pulit halor ka jingkynnoh donkti ban kynshoit bad pynshit ia ki paidbah ba kin hiar thma ia ka Chief Minister Office (CMO), Tura,kaba lam sha ka jingkulmar kaba jur hapoh kane ka nongbah jong ka West Garo Hills District.
Ka Iingkashari kala phah ia u Richard ha ka police custody ba lai sngi ban tohkit ia ka jingiasylla ha lyndet ka jinghiar thma ia ka CMO katba ka dang iaid ka jingialang hapdeng u Myntri Rangbah ka Jylla Conrad K Sangma bad ki kynhun Sengbhalang ba iakhih ha ka janmier 24 tarik Naitung.
Ha ka sngi Balang hadien ka jingshah kem, u Richard ula ud pang bad la kit noh ia u sha Tura Civil Hospital ban leh medical check up ha kaba ki Doktor kila bat ia u ban ioh test shuh shuh bad ban khmih ia ka koit ka khiah jong u.
Ia ka jingsuba don bynta jong u ha kane ka jingkulmar ha Tura kala mih hadien ba bun ki nongtrei ka TMC kiba thaw jing kulmar kila shah kem ha ki Pulit. Uwei na kine ki nongtrei ka TMC ula phla ha ki Pulit ula sahmiet ha ka Iing jong u Richard hadien ka jingpynkulmar ban lait na ka kti ki Pulit.
Watla ki Pulit kila ioh ban tohkit laisngi ia une u Nongialam ka TMC hynrei kila khmih lynti ba kin sa kyrpad biang ia ka Iingkashari ba kan nang pynjlan iaka sngi hadien ba une u Nongialam ka TMC ula lait na Hospital.
Pule ruh: Ioh pynhiar mynsiem u Pradyot ba iakynduh ia ki Heh MHA, dang buhteng ban pynbna ia u ksiang
