Nongpoh, Jymmang 12 : Haduh 40 ngut ki Nongshongshnong ka Nongladaw, Ri-Bhoi District, kila kem pang kynsan kynsan na ka jingbam ia ka dohkha ba la shet ha kawei ka Iing iap briew ha Assam.
Kane kala jia tang hadien katto katne sngi naka jingkem pang haduh 160 ngut ki briew ha ka shnong Adokgre bad Kharkutta, hadien ka jingiabam ia ka dohkha ba shet ha ka iing iap briew ha ka shnong Mariampur, Goalpara District.
Kumba long ha Ri-Lum Garo, ki 40 ngut ki Nongshongshnong ka Nongladaw ruh kila ioh pang kynsan kynsan bad ki shu prie pynhiar bad suhkpoh hadien ka jingbam dohha ha ka iing iap briew ha Mariampur, Assam. La antad ba kine ki briew ki kem pang ki lah ban dei kiba ngat na kajuh ka Iing iap briew.
Kane ka jingkem pang kine ki nong Nongladaw kala jia ha ka 9 tarik Jymmang, kaba dei ha kajuh ka sngi ba kem pang ki paidbhur na Adokgre bad Kharkutta.
Kat kum ka jingiakren bad ki, kila pyntip ba ha kane ka iingiap briew, ka dei ka dustur ba ki ju ai bam da ka dohkha bad u phan lem bad u dai. Ki ong ba baroh kiba wan sngewlem kila iabam ia kane ka ja khlem da poi pyrkhat b aka dohkha kan long bih.
U Dr. L. Gashnga, Doctor ka Patharkhmah CHC, u la iathuh ba ki bor Hospital kila ioh jingtip ia ka jingdon jong kine ki briew kiba kem pang kynsan ha Nongladaw.
“Haba ioh ia kane ka jingtip, ngi la phah ia artylli ki kali kit nongpang ban leit shaw ia kine ki nongpang hynrei namar ka jingdon bun ngut, la kyrpad ruh ia ki bahaiing hasem ba kin pyndonkam lang da ki kali shimet ban pynpoi ia ki sha ka jaka sumar” ong u Dr Gashnga.
Kat kum ka jingong jong u, ki nongpang kila kem prie pynhiar bad suhkpoh bad kane ka jingpang kala jur bha ha katei ka shnong ha kaba la don haduh 40 ngut kiba pang baroh. U ong ba donbok pat bala tip kham kloi ia kane ka jingjia ba kine ki nongpang kila ioh ia ka jingsumar.
Shuh shuh ruh, u Dr. Gashnga u la ong, ba katkum ka khana ba la pynpaw da ki nongpang, la ong ba ki la leit sha ka iing iap briew ha kawei ka shnong ha Assam ha kaba ki la bam ruh ia ka dohkha bad kiwei kiwei ki jingbam ia kaba la suba ba ka jingkem pang jong ki ka lah ban dei namar kitei ki jingbam.
Ula pyntip ba haduh mynta ka sngi, la don katto katne ki nongpang kiba la ioh ban leit phai noh sha la ki iing ki sem bad don satang katto katne kiba dang hap ban shah sumar.
