Nongstoin, Jylliew 27 : Ki Pulit ka West Khasi Hills District, kila kem sa 4 ngut ki trai jong ki karkhana coke ba treikam be-ain hapoh ka District haba pynap ruh da ka ain Banami Act pyrshah ia ki trai shnong kiba pynshah kyrteng na ka bynta ki Bar Jylla ba kin seng karkhana be-ain.
Kine ki 4 ngut ki kyrteng u Hopeful Nongtdu ba na Rymbai Synrang Shahkhain, East Jaintia Hills, u Khrawbok Rongrin ba na Sohbar A, Shallang, u Ashish Arya ban a Basisthapur Bye-Lane, Guwahati, Kamrup bad u Yaman Bansal ban a Beltala Tiniali, Guwahati, Kamrup.
Ia kine ki trai karkhana coke ba beain la kem hynnin ka 26 tarik Jylliew da ki Pulit Special Investigation Team (SIT) ha ryngkat ka jingiadonlang ki Magistrate bad ki DMR. Ia kine ki 4 ngut la pynngat happh ka Shallang PS Case No. 39(12)2022 U/S 188/34/379/120 B IPC R/w Sec 3(1)/21(1) MMDR Act, R/w Sec 15 Environment (Protection) Act bad Sec 3 Explosive Substances Act.
Dang ha ka taiew bala lah, ki Pulit SIT kila kem ia uwei u hehspah na Beltola uba pyniaid ia ka karkhana coke ba beain ha Shallang. Une u hehspah u kyrteng u Youdishtra Bhama, trai jong ka M/S Kalyani Fuels Limited.
Na kine ki 4 ngut ba dang shu shah kem, u Hopeful Nongtdu u dei jong ka M/s HV Coke Limited bad ki lai ngut kiwei pat ki dei jong ka M/S Yash Coke Limited.
Kane ka jingkhynra ia ki karkhana coke ba beain hapoh West Khasi Hills kala jia tang shisngi hadien ba ka Iingkashari Meghalaya High Court kaba bthah ia u Director General of Police (DGP) ban wad ban kem ia baroh ki trai jong ki karkhana coke ba beain hapoh ka Jylla.
Haba iakren bad ki Heh Pulit ka District, la iathuh ba ki don haduh 61 tylli ki karkhana coke ha ki thain Shallang, West Khasi Hills bad napdeng kine, tang 4 tylli ki dei kiba don ia ki kot ki sla kiba biang ban treikam katba kiwei kiwei ki dei ki ba shu treikam be-ain.
Ki pyntip ba bun na kine ki karkhana be-ain la khang khyrdep lut mynta bad ka jingthwet ia ki trai kala iaid shakhmat.
Ka Iingkashari ha Nongstoin kala shlei mynta da ki nongiasaid Ain kiba wan na kylleng ki jaka ban pyniakhun mukotduma bah jamin lypa ia kiba bun ki trai jong ki karkhana coke ba phetrieh mynta.
Haba kylli, ki Heh Pulit ki pyntip ba ha ka jingtohkit ia kine ki karkhana ba be-ain la shem ba bun na ki Khasi kiba pynshah kyrteng na ka bynta ki bar jylla ba seng karkhana coke be-ain ki dei n aka kur Nongrum bad Sohbar.
“Ngi la pynap mynta da ka Benami Act ia kine ki trai shnong kiba pynshah kyrteng bad ngin sa leit kem noh ia ki ha kine ki sngi ban dang wan ban tian bishar ia ki kat kum ki kyndon ain” ong ki heh Pulit.
Lah ban kdew hangne ba ka ain Benami ka dei ka ain ban tehlakam ia ka jingleh business ha ka kyrteng kiwei ban buhrieh ia ka jingdon jingem bad ban lait ka siew khajna sha ka Sorkar.
Ia kine ki 4 ngut kiba shah lem la ialam tian bishar hynne ka 27 tarik Jylliew bad ka Iingkashari kala phah set ia ki hapoh ka Judicial Custody kaba 14 sngi.
Pule ruh: Manipur : Bynniaw jur ki shipai ba pakhang lynti ki Kynthei ban hiar pynlong ia ki jingkhynra
