Shillong, Lber 19 : Ki Pulit ka Jylla Meghalaya kila ioh ban kem ia ka kynhun ki nongkhaii briew ba kynthup ia kawei ka kynthei Bangladesh bad arngut ki nong India, ha ka jingkhynra ha kylleng ki jaka hapoh ka Jylla.
Haba shimkhia ia ki jingioh khubor syntiat, ki Pulit kila buh ia ka khyrdop talasi hajan Byrnihat Outpost ha ka sngi Ba-ar bad ioh bat ia kawei ka kali AS01-FJ-4645 ha ka por 4:10 baje janmiet, kaba wan na khappud Dawki sha Guwahati, Assam.
Ha ka jingtalasi, kila lah ban pynithuh ia kine ki briew kum ka Jannati Sheikh (26) ba na Jasor, Khulna kaba don ia ka Aadhaar Card thok ka Ri India bad u Raushan Khan, uba sah ha Rangapani, Barpeta, Assam, uba niah ia ka kali.
Ha ka jingtohkit, kine baroh arngut kila phla ba ki dei kiba don bynta ha ka kam khaii briew, ban pynpoi ia ki briew hapdeng ka Ri Bangladesh bad India ban kamai pisa khlem ki kot ki sla kiba biang.
Da kane ka jingphla, ki Pulit kila register case ia kine ki briew hapoh ka Nongpoh Police Station bad la pynngat ia ki ha ki kyndon bapher bapher jong ka Bharatiya Nyaya Sanhita (BNS) bad ka Foreigners Act, 1946.
Haba ngam jylliew ha ka jingtohkit, ki Pulit kila kem sa ia uwei u briew ba kyrteng u Balajied Khongsun (27), uba dei na Wahlyngkhat, Pynursla, East Khasi Hills. Ia une u briew la kem ha ka sngi Balang.
Ki Pulit ki iathuh ba ka jingtohkit mynta kala iaid shakhmat ban lapdien sa ia kiwei pat ki briew kiba donkti ha kane ka kam khaii briew.
