Shillong, Risaw 17 : Ki Pulit ka East Jaintia Hills hynne ka sngi Ba-ar, kila ioh ban kem ia uwei u snar nongshalan droks ba na Mizoram bad na ka met jong u, la ioh ban ioh haduh 1 kilo tam u droks amphetamine.
Une u Nongkhaii droks u kyrteng u Joseph Hmangaih Zuala ba na South Aizawl, Mizoram bad la iohkem ia u napoh kawei k abos Night Super (AS 01 LC 6216) ha ka shnong Nongsning kaba don ha surok NH-6, iathuh u Superintendent of Police ka East Jaintia Hills Jagpal Singh Dhanoa.
Halor ka jingtohkit kat kum ki kyndon ka NDPS Act ha ka jingiadonlang ki sakhi shimet , ki Pulit kila lap ia kawei ka pla plastic kaba don ia une u droks, ia kaba la thep ha kawei ka suitcase rong purple.
Une u droks u khia haduh 1.017 kilo bad ha ka jingtest la pynthikna ba u dei u amphetamine (crystal meth) uba dei u jingdih buaid ba la khein beain.
Une u Heh Pulit u iathuh ba kat kum ka jingtip ba ula ioh lum, kala don ka synjuk (syndicate) jong ki nongkhaii droks ba pyniaid iew ia u droks na kawei ka ri sha kawei pat ha kaba ia u mar (droks) la khaii ha ka dur jong u crystal meth sha ki Rib a marjan bad hadien pat la pynkylla ia u sha ki kuli methamphetamine.
Ia une u briew la register case ha Khliehriat Police Station bad ka jingtohkit mynta kala iaid shakhmat ban nang tih jylliew ia kane ka kynhun nongkhaii droks.
