Shillong, Naitung 19: Ki pulit jongka East Jaintia Hills, kila ioh kem ia ki 5 Ngut ki nongkhaïi Drok kiba dei naka jylla Manipur bad ioh ban kurup ia u drok ba khia haduh 197.35 Gram.
Ki pulit kila iathuh ba ka jingiohkem ia kitei ki 5 ngut kala wan jia lyngba ka jingiohkem shuwa ia ki 2 ngut ki kynthei na Nongsning, kaba jia ha ka 16 tarik u Naitung ha ka por 5 baje mynstep.
Ki pulit haba ioh ia ki jingtip kiba thikna, kila pynlong ia ka jingpynapshrip ha BMS Fuel Station, Nongsning bad kila bat ia kawei ka kali sumo bad haba pynlong iaka jingtalasi ia kane ka kali, kila ioh kurup ia u drok Heroin na kitei ki kynthei uba khia 197.35 gram.
Ha kane kajuh hi ka sngi, ka kynhun ki pulit na East Jaintia kala wan hiar sha nongbah Shillong bad da ka jingiatreilang bad ki pulit jong ka East Khasi Hills, kila leit kem iaka Ngai Rami na Nongmensong kaba dei ban shim ia utei u Drok na kitei ki ar ngut.
Ha kaba iadei bad kane ka jingjia, ki pulit kila rejistar case hapoh Khliehriat Police Station hapoh ki kyndon jong ka NDPS Act.
Ki pulit kila bteng iaka jingtohkit iaka Ngai Rami kaba la phla biang sa ia ki arngut kiba donkti ha kaban khaïï ia u drok na Manipur.
Ha ka 18 tarik u Naitung, ki pulit ka Khliehriat kila wan hiar biang sha Shillong ban kem ia u Khailen Hoakip bad ia ka Lheineihoi Hoakip bad la kit noh ia ki sha Khliehriat na ka bynta ban pynlong shuh shuh iaka jingtohkit ha kaba iadei bad ka kam khaïï drok.
Pule lang ia kane: Hukum ka Iingkashari ban set phatok 10 snem ia ki nongleh beijot
