Shillong, Nailar 08: Ki Pulit ka Anti Infiltration Check Gate Byrnihat, Ri-Bhoi District mynne ka sngi kila ioh bat ia 7 ngut ki nong Bangladesh.
Kine ki nong Bangladesh kiba shah bat ki kynthup 3 ngut ki Rangbah, 2 ngut ki longkmie bad 2 ngut khunlung (1 shynrang bad 1 Kynthei).
Haba iakren bad kine ki briew kiba shah bat haki Pulit kila iathuh ba kidei naka shnong Bhangura kaba hap ha Upazila District ka Ri Bangladesh.
Uwei naki ba shah bat ula iathuh ba kila wan daka Rel na Bangalore sha Guwahati bad na Guwahati ki shim daka Bos ha Khanapara bad na Khanapara kila shim daka Taksi ban kiew sha Shillong.
U iathuh ba ha Bangalore baroh ki trei kum ki nong tam tin jot bad kila wan kiew sha Shillong ban leit phai shaka shnong sha Bangladesh.
Ki Pulit ki iathuh ba kine ki briew ki la wan sha India la shisnem mynta bad ki iasah ha Bangalore hynrei namar ba ka sorkar ka la beh noh ia ki kumta ki la pyrshang ban rung na ka Jylla Meghalaya ban leit phai noh sha Bangladesh.
Une u nong Bangladesh u iathuh ba u don ka jingthmu ban leit shwa ha Nongpoh bad lada u ioh bylla hangne un sah hangne lada ym ioh bylla un dang iaid kylleng ban wad bylla na ka bynta ban im.
Kawei ka longkmie ka la iathuh ba ki siew T.20 hajar ban ioh ban rung sha ka Ri India bad ki la don ki briew ki ba la pynbiang lypa ia ka kam ka jam ha Bangalore hynrei na Bangalore sha Meghalaya kila wan na ka bynta ba kan leit noh sha Bangladesh.
Ha kaba ia dei bad ka ne ki pulit ha Infiltration Check Gate ki la iathuh ruh ba kin sa iati noh ia ki nong Bangladesh sha Byrnihat Police Station ban leh iaka ba donkam.
