Shillong, Jymmang 25 : Ki Pulit ka East Khasi Hills, kila ioh ban kem ia uwei u briew uba kam ialade kum u Ophisar ka Tnad IB ka Sorkar Pdeng, uba la ioh kamai palat T. 80 lak na suin ha suin tang da kaba shukor ban pyniohkam ia ki Nongshongshnong ka Jylla.
Une u runar u kyrteng u Richard Tiplang Swer ba 39 snem ka rta, uba shong ba sah ha Wahiingdoh. Ki pulit kila ioh ruh ban kurup ia kawei ka Bolero ML05-Z-3007 ba don bad ka light saw, ka mobile, ka laptop bad ki kot ki sla ba donkam na ka iingsah jong u.
Haba pyllait ia kane ka khubor, u Superintendent of Police (City) ka East Khasi Hills Bah Vivek Syiem, ula kyntu ba lada don kino kino ki briew kiba la ngat ha ki kam shukor jong une u runar, ba kin leit buh da ka ejahar pyrshah ia u ha kino kino ki Police Station kiba marjan.
U Bah Vivek u iathuh ba ka Tnad kala ioh pdiang ia ka jingujpr ha ka 16 tarik Jymmang 2023 ia ka jingdon une u briew uba kam ialade kum u Ophisar ka tnad IB jong ka Ministry of Home Affairs (MHA), uba iaid tyrwa kam ha Secretariat, Shullong lyngba ka MPSC bad DSC.
U iathuh ba une u runar ula bthah ia une u nongmudui ba un lum ia ka pisa na baroh ki briew kiba kwah ia ka kam kat kum kyrdan pule jong ki.
U Bah Vivek u pyntip ba une u nongmudui ula dep ban lum ia ka pisa haduh T. 80,00,000 (phraphew lak) na ki 38 ngut ki briew naduh u snem bala lah bad la siew ruh ia kane ka pisa sha une u runar. La iathuh ba une u runar hadien ba shim ia ka pisa, ula kiar lai lum lai wah na une u Nongmudui namar ka jingbym urlong ka jingpyniohkam.
Nalor kane, u Bah Vicek u pyntip ba ki pulit kila ioh pdiang biang sa kawei ka ejahar ha Lumdiengjri Police Station ha ka 22 tarik Jymmang 2023, ba une u juh u runar ula kam ialade kum u Ophisar ka Police Special Branch bad kular ia u nongmudui ba u lah ban pyniohkam ha ka Tnad Pulit halor ka kyndon ba ki nongkwah kam kin hap ban siew T. 1,00,000 (shi lak) ia ki bym pat pass matrik bad T. 50,000 ia kiba la pass matrik.
Une u Heh Pulit u pyntip ba une u Nongmudui ula iathuh khana ia kane sha ki paralok bad uwei na ki paralok ula ai ia ka pisa advance ba T. 50,000 sha une u runar lyngba u nongniah kali jong u ha Motphran, Shillong. Kane kala jia ha u bnai Lber 2023.
U Bah Vivek u pyntip ba halor kane ka jingjia, kila don artylli ki case bala register kawei ka Mawlai Police Station kat kum ka C/No. 45(05)2023 hapoh ka kyndon 419/420 IPC pule lang bad ka kyndon 66D IT Act bad kawei pat ha Lumdiengjri Police Station kat kum ka C/No. 71(05)2023 hapoh ka kyndon 419/420 IPC.
Ka jingtohkit ia une u runar kala iaid shakhmat mynta.
