Shillong, Jymmang 21 : Ki Pulit kila iohkem ia u nongniah ka trok uba don bynta ha ka jingiuh ia u nongniah ka bolero pick-up haduh ba poi sha ka jingiap, ha ka shnong Lumshnong, kaba lam uh sha ka jingshah thang ki 15 tylli ki trok ha phyllaw ka kompani Star Cement.
Ia une u nongniah trok la kem hynnin ka sngi Ba-ar bad ka Iingkashari kala phah set ia u hapoh ka Judicial Custody.
“Ngi la kem ia une u nongniah trok bad la set ia u hapoh ka Judicial custody. Ki Pulit kila leh ia kaba donkam kat kum ki kyndon jong ka Ain” ong u Superintendent of Police ka East Jaintia Hills ha ka kyrwoh.
Ha ka 18 tarik Jymmang, uwei u nongniah ka bolero pick-up ula iap na ka jingshah iuh ha kane ka trok, kaba lam sha ka jingkhie bhur ki paidbah kiba la thang syndon haduh 15 tylli ki trok ha phyllaw ka Star Cement. Kine ki paidbhur kila thombor ruh wat ia ki Pulit kiba pyrshang ban tem ia ka huri hura.
Kane ka jingjia kala jia hadien ka jingiatakhuh hapdeng kane ka trok bad kane ka bolero pick-up ha Wahiajer. U Nongniah ka trok ula phet krad na kane ka jaka kaba pynlong ia kane ka bolero ban kthong shaduh sha phyllaw ka Star Cement.
Ynda poi ha kane ka phyllaw, une u nongniah ka bolero pick-up uba dei ruh u trai shnong, ula kiew ha kane ka trok ka Star Cement bad shoh ia u nongniah bad ha ka jingpyrshang ban phet, kane ka trok kala ioh iuh ia une u nongniah ka bolero pick-up, kaba poi sha ka jingiap.
