Calcutta, Rymphang 29: U Nongialam ka TMC Sheikh Shahjahan ula shah kem ha ki Pulit ka West Bengal na ka thain Minakhan kaba hap hapoh ka North 24 Parganas hynnin ka miet sngi Balang.
Une u Nongialam ka Trinamool, uba la shah kynnoh kurup jaka jubor bad jrong kti ia ki kynthei ha ki nongshongshnong ka Sandeshkhali, ula ngat shong along ba 10 sngi hapoh ka Police Custody kat kum ka hukum ka Iingkasahri North 24 Parganas District hynne ka sngi Palei.
Kat kum ka jingiathuh ki Pulit ka Basrihat, ka Sorkar kala pynjari ia ka kyndon 144 CrPC ha ki 23 tylli ki jaka kiba hap hapoh ka Sandeshkhali ban tehlakam ia ki jingkulmar hadien ka jingshah kem u Sheikh Shahjahan.
Ki Pulit ka Minakha Police Station kila ujor case hapoh ka kyndon 11 pyrshah ia u Sheikh Shahjahan ha Nyajat Police Station bad la phah pat sha Barirhat Sub District Court.
Haba iakren bad ki nongthoh khubor, u Lat ka Jylla West Bengal CV Ananda Bose ula ong “Kan don beit ka jingshai haba kut jong ka tunnel. Kata ka dei ka iti synshar paidbah. To ngin kyrmen mynta ba ka jingtreikam ka ain kan wan phai biang ha Bengal”.
