Shillong, Jymmang 25 : Ki Pulit ka Sohra Police Station, kila ioh kem ia uwei u nong Bangladesh bad arngut ki nong Ichamati kiba iarap ban pynprong tuh na khappud.
Ia kine ki lai ngut la ioh kem na kawei ka Maruti A Star AS01-AP-0928 najan ka jaka peitkai ka Nohsngithiang.
Kat kum ka jingiathuh u Superintendent of Police Bah Vivek Syiem, ula iathuh ba halor ka jingioh khubor, ki Pulit ka Sohra kila pynlong ia ka jingiatalasi ha ka thain bad ha ka por 4 baje janmiet, kila pyrshang ban bat ia kane ka Maruti A Star hynrei kane ka kali kala phet bad ha ka jingiakthong, la ioh ban bat ia ka hajan Nohsngithiang.
Ia kine ki briew la kit noh sha Sohra Police Station bad ha ka jingtohkit, la lap ba uwei u dei u nong Bangladesh ba kyrteng u Robiul Islam ba 32 snem, uba dei na Tengra Khali, Bangladesh.
Une u briew u dei uba trei kum u Electrician ha Bangalre bad u kwah ban leit sha Bangladesh. Kaei kaba paw ka long ba une u briew u ju pyndonkam bha ia kane ka lynti iaid.
Ki arngut kiba iarap ia u ki dei kiba kyrteng u Sujit Hajong ba 32 snem bad u Ravi Singh ba 38 snem, kiba dei na Iew Ichamati, East Khasi Hills.
Ka jingtohkit mynta kala iaid shakhmat bad ki Pulit kila register case hapoh ka Foreigners Act pyrshah ia une u nong Bangladesh.
